Guwahati, Sept 27: Hindu toromni political dolrangko warachakna gita songgimin India-ni Muslim political dol ba Popular Front of India (PFI)ni kosako rakgipa ja·kuko de·atenba gimik sak 25 PFI-ni dilgiparangko Assam police, a·dokni dingtang dingtang district-rangoniko Mongolbar salo rim·aha.

Uamangoni sak 5 manderangko Kamrup district-oniko rim·aha, Goalpara-oniko sak 10, Karimganj-niko saksa, Udalguri-niko saksa, Darrang-niko saksa, Dhubri-niko sak 3, Barpeta-niko sak 2 aro Baksa district-oniko sakgniko rim·aha ine koborna u·iataha.

Iana skang, Assam a·dokni dingtang dingtang biaprangoniko aro Delhi-oni saksako man·chape sak 11 PFI-ni dilgiparangko Assam police rim·aha. Indake dingtang dingtang a·dokrangoniko tanggitik chadrapanirangko dakatanichi National Investigation Agency (NIA), dolgipinni kosako chakate kam ka·na a·bachengatgipa doloni gimik-gimang sak 106 manderangko rim·tokaha.

Indake ong·engon, Popular Front of India (PFI)ni kosako gnigipa gadango am·sandiataniko National Investigation Agency (NIA) aro gipin sandiatgipa dolrangchi dakataha.

NIA, a·songoni Muslim political dolni kosako ja·ku de·aniko dondikgijan dakengkua aro PFI-ni kosako chadrapanirangko damchet dingtang dingtang a·dokrango dakatenga. Uandaken, PFI-ni mitam manderangko rim·na man·aha.

A·bachenge sandiatanirangko dakanio, uamangko sing·rok-sanrokanio adita gamchatgipa ma·sie ra·anirangkoba dakna man·aha. NIA-ni u·iatanio pangchake, police aro gipin sandiatgipa dolrang damchet a·dokrango chadrapanirangko dakatenga ineba koborko man·soaha.