Tura, Jan 30: Garo Hills Autonomous District Councilni CEM Benedick R Marakko ra•gale sakgipinko songjitna miksonganiko knae bang⋅a A⋅chik a⋅songni NGO-rang an⋅tangtangni suk ong⋅gijaniko parakatokaha. Ia koborko man⋅e chinga namen jagokaha aro ian mikkangchi district councilko rikanina namen ja•guaniko ra•bachongmotgen aro indake NPPni dilgiparangni dakaniara kraani ong•ja ine ADE ni Padot Dalseng Bira parakataha. Uamangni janapani gita, GHADC-o dingtang dingtang neng•nikanirang bang•beachim, kam ka•giparangna dormahako on•a man•jachim.
Kam ka•gipa manderang GHADCni kosako jingjengate kamrangkon ka•tokjaha. Uni gimin dingtang dingtang NGOni dilgiparang, GHADCni sichipaniko nikna sikjae, uamangni kamko chakchike ka•pachina, aro man•a dipet neng•nikanirangko namatna ine mol•molaha.
CEM Benedick R Marak, pilak neng•nikanirangko namatna rake kamko ka•aha, dormaharangko on•a a•bachengaha, manderang kamtangtangko ka•na a•bachengaha. A•dok sorkari tangka-paisako on•e dakchakjaha, kajina gile man•gipamangmangchide district councilko chalaina man•chongmotjaha. Adita neng•nikanirangko chile, name kamrangko ka•mitingo so•sojengjeng ong•ataniara namchongmotja, ine FKJGP ni Padot Pritam Arengh janapataha.
ADE, GSU, FKJGP, AYWO, Tura Senior citizens Forum, FAF, New Tura Development Forum, Garo Graduate Union aro dingtang dingtang dingtang NGOni dilgiparang NPPni dilgiparangni dakdilaniko ong•e nikjaha aro ra•chakna kraani ong•ja ine parakattokaha. Ma•mong sorkarioniko bang•a dakchakaniko man•a ka•dongsoanirang gnang. Bang•bate tangka-paisarangko chamatgenchimode nambata gadango tang•dororoani aro silroro-namroroaniba ong•pagnokchim. District councilo kam ka•enggiparangnaba dakchakaniba ong•begnokchim. Indakmitingo adita manderang an•tangtangni namgnina mikboke dakenganiara jat gimikna gimaani ong•chongmotgen. Uni gimin pilak songdongenggipa manderang District councilni memberang iako name kam ka•tokode namgen in⋅e GSU ni Padot Tengsak G. Momin ba molmolataha.
NPP aro Conggresschi dilengmitingo uamang kam ka•giparangna bilsi gittamna dormahako on•a man•jaha. Da•o chalaenggipa EC pilak neng•nikanirangko nigrike kam ka•aha aro nambate kam ka•angna taritokengaha aro ka•aba ka•engaha, indakmitingo saksa sakgipinko galone kam ka•grikaiode an•ching jatde maiba ong•siaona sokna ba gnang.
District councilara jattangni manderangchin, a•dokni gam-jin dakbewal-rikbewalko ripingna on•gimin ong•a, unigimin District councilko chalaigiparang, gisik seng•e, jatko ra•dona namatna kamko ka•angpabo ineba mol⋅molaha.
Indake da⋅o council ni pilak nama kamrangko ka⋅na ja⋅ku ga⋅akaniko ja⋅dongaataniko chinga raken jegalchongmotenga ineba AYWO ni padot Sengbath Ch. Marak ba janapataha.
NASO ni saksa dilgipa Manseng A. Sangma pilak MDC rangko jatni namgnina gitcham EC baksa nangrime kam ka⋅angchina mol⋅molataha.
