Shillong, Dec 8: Khasi Hills-o donggipa cement-ni karkanao kamko ka·enggiparangna ru·uta jarangonin dormaharangko on·kujaengani gimin a·dok sorkariko nirokatchina gita su·dodoe, Mawmluh Cherra Cement Employees Union da·al November 8 tarikoni dondikgija okgimu chake jing·jengataniko a·bachengataha aro apsandake karkanakoba chalaiangkuchina gita sorkario mol·molaniko dakjolaha.
November 2015 bilsioni March 2016 bilsiona gimik ja 5-ni dormaharangko aro ia bilsi 2020, February jaoni da·ona gimik ja 10-ni dormaharangko on·china dabianga baksa, 2013-oni da·ona gimik bilsi 7-rangna kingking somai bate kamrangko ka·baani tangkarangko aroba April 2018 bilsioni da·ona dormaha bariatani arrear-rang gimikkon on·china gita union dabiaha. Unbaksana, kam ka·giparangni gipin man·gnirang aro medical reimbursement-koba on·china gita union dabiangjolaha.
Unomiting, cement-ni karkanao kamko ka·enggiparang gimikni mikkangchi namgnina re·mikkange kamko ka·atenga ine union-ni padot, Shanlang Diengdoh aganaha.
Karkanao kamko ka·enggiparang gimik-gimang sak 500-mangna bata. Indake ong·engon, karkanako mikkangchi chalaiangkuna man·na gita uno kamko ka·enggiparangna on·kugijagipa dormaharangko aro gipin man·gnirangko on·china dabienba okgimu chake jingjengataniko dakana agrede chingna minggipin chol dongjaha ineba union-ni padot agandapaha.
