Mumbai, Nov 22: Pekatgipa sam Cannabis gram 86.5-rangko man·ani ja·man bal·ek-chol·ek dake agana sapachi manderangko namen ka·dingatna changbegipa me·chik Bharti Singh aro uni segipa Harsh Limbachiyaa-maangko Narcotic Control Bureau (NCB) mija Sonibar salo rim·aha.
Uamang sakgnikon Narcotic Drugs and Psychotropic Substance (NDPS)ni ning·o donenga aro Robibar salo kam ka·gipa kachario uamangko mikkang pa·atenga ineba koborko man·soaha.
“Iana skang (FIR No 16)o janapgimino uno pangchake aro iani gimin sandidapaniko dakatanio NCB mija Sonibar salo production office aro manderangko ka·dingatna chanbegipa Bharti Singh-ni nokko man·chape tanggitik noko nape sandirikkitatanio ge·gninikon gram 86.5-rang ong·pilgipa pekgipa ringani Ganja-ko man·aha. Bharti Singh aro segipa Harsh Limbachiya jiksesan Ganja jakkaalako ku·chaktokaha. NDPS Act 1986-o dongimin niamrango pangchake Bharti Singh-ko rim·aha aro uni segipa Harsh Limbachiya-ni ia mamlao jak dongpaaniko sandiatanirang ong·enga,” ine NCB-ni koborna seachi u·iatanggipao janapaha.
Bollywood-o drug jakkalani mamlarang nakataniko sandirokatgipa dolrangchi kam ka·anganio uamang jiksesako rim·aniba joljolan ong·skaaha. Indake ong·engon, gram 86 ganja-rangara bang·gija mangmansan ong·ani gimino aro palna-sim·na toani ning·o ga·akejani gimin Bharti ia mamlao ru·utgijan jamin man·aigen ineba ma·sigipaoniko koborrangko knasoaha.
Batanggimin jagnirangni gisepon, pekatgipa samni mamlao sak 25 rangna bata manderangoni dakmesokgipa ba actor-rang jekai Preetika Chauhan, jawilwat tarigipa Firoz Nadiadwala-ni jikgipa Shabina Saeed, Australia-ni mande Paul Bartel aro South Africa-ni mande Agisilous Demetriades-maang gimikko man·chape sandirokatgipa dolrang rim·aha.
Dakmesokao niksenggipa actor-rang jekai Rakul Preet, Sara Ali Khan, Shraddha Kapoor aro Deepika Padukone, Arjun Rampal-maang gimikan actor Sushant Singh Rajput sagini sianganio nangchape drug jakkalani mamlaona sokanganiko sandirokatmitingo NCB-chi sing·rikkiatako man·tokaha
