Shillong, Sept 6: Chasong damberangni da·ororo pekatgipa samrangko skatang jakkaltokengani a·sel namen jajrengna nangenganiko a·doko komiatna gita man·adipet Meghalaya-o dingtang dingtang cholrangchi jottonrang ka·genchimoba nokdangoni aroba ripengskarangoni iandakgipa pekatgipa samrangko jakkalenganiko u·igenchimoba ma·siatgija donchipaianichi namen rakbegipa ra·bianiko chagrongna gita nangenga.
Manderangni iandake drugs jakkalanirangko champengna aro manderangni skatang pekatgipa samrangko jakkalenganiko ba nangana batpile jakkaltokenganiko ma·siate on·china gita manderangko didie Meghalaya-ni Social Welfare department iani bidingo bimchipe kamrangko ka·atenga.
Iani bidingo Social Welfare aro Excise Minister Pa Kyrmen Shylla-ni aganangani gitade, drugs jakkalanirangko donnuani a·sel uandakgipa manderangko ma·sianio namen rakbegipa kam ong·a. “Iako uamang darangnaba aganja baksana nokdangoni manderangnamangba parakja,” jeni gimino uandakgipa manderangko sandie namgipa sana-bananirangko on·anio department-na namen rakbegipa kam ong·a ine ua parakataha.
Chu ringgiparangko toe aganengon, uandakgipa manderangkode ku·bibachin dingtangmancha ma·sina man·aia indiba drug jakkalgiparangde indake ong·skaja ine aganenba, iani a·selan dugae jakkalgiparangko bang·a changon ma·sina namen neng·a ineba ua agandapataha.
Indake ong·engon, dugae drugs jakkalaniara mandeni mingsa sabisi ong·a ine agananio, iako somoi gita nirokna man·ode namaona ra·bapilna gita man·a ine aganangan baksa, pekatgipa samko jakkalgiparang iani gimin an·tangtangko ma·siatna nanga aro nokdangoni ma·siode u·iatskana nanga maina ia sabisiko sane namatpilna gita man·a ineba minister parakatjolaha.
Unomiting, pekatgipa samrangko niam gri badingsrukenggiparangko champengna gita pangnan mikrake dongachi kamrango chu·sokgipa ong·enganina minister, police department-koba de·mittele aganangaha.
