Tura, Apr 30: Batanggimin salrango dumper truck garirangni skatang salanichi biap damgnio a•sel ong•e salgakako man•gipa manderang bilongbee saknaanirangko man•tokahani gimin Tura jillao gari gorarangko salenggipa manderang kenesa garirangko salna nangtokengaha.
Social media-rango kakketko sandichenggija skatang koborrangko seatengani a•selba manderangni gisepo kenjagokanirang ong•katenga aro iani bidingo West Garo Hills a•jani Deputy Commissioner Jagdish Chelani, bostu salgipa truck garirangko somoi gita Tura jillao napna on•na ku•rachakanikoba on•ataha.
Adita salrangna skangsan, Tura-ni Matchikol jolo, bike bolsako dumper truck bolsa ta•rakbee re•angenba salgakahachim aro ia bike-ko adita chel•kala biaponan ia truck gari salchapangahachim. Ia a•sel ong•anio bike-ko salgipa mandeni ja•a samsa be•na gita nangahachim. Iana skangba, Tura-ni Ballonggre jolo, scooty bolsako dumper truck gari salgakeahachim aro ia a•sel ong•anioba me•chik bi•sa sakgnioni saksa an•tangni ja•a samsako gimaatna nangahachim.
Indake ong•engon, Mongolbar pringwalo bilsi 29 ong•gipa Chekam A Sangma, Dakopgre jolo donggipa SMELC building samba jolo, scooty a•sel ong•enba adita mata bu•anirangko man•skaaha.
Ia a•sel ong•ani Mongolbar pring 3:00 bajimango ong•aha aro ua somoio ua Daldagre-o mande siaona re•ange noktangona re•bapilengachim.
SMELC building sambaona sokon, uni janggilchi dumper truck gari bolsani ta•rakbee re•baengako ua nikataha aro truck garina kenjagokenba ua an•tangni scooty-ko ramani jakasichipak sale katna jotton ka•on, ua scooty baksa ramao ga•ake saknaanirangko man•na nangaha. Ia a•sel ong•anio dumper truck garide scooty-ko salgakade ong•jachim indiba ua an•tangsa scooty baksa a•sel ong•aha ine police-rang talataniko on•ataha.
Ja•mano ua an•tangan scooty sale noktangona re•angkuaha aro adita kontarangni ja•mansa uko hospital-ona rimange sanna bananirangko on•aha.
Ia a•selni bidingo social media-rango tol•e seanirangko bebera•jachina gitaba police-rang didiataha.
Na·simang ia video-koba nina man·gen:
Na·simang iakoba poraina man·gen: Be•enni gita neng•nikaniko man•gipa adasarang wa•al kame sia, ma•gipa bilongbee saknaatako man•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
