Guwahati, Jan 3: Nagaland aro Manipur a·dokni simao donggipa Dzukou a·kaweo kamenggipa wal·sareko kimitna gita Robibar pringonin Indian Air Force (IAF) rakbee kamrangko ka·engkua.
Ia biaprango kamenggipa wa·alko kimitna gita dingtang dingtang dolrang rakbee kamrangko ka·engoba a·dok damgnichipakan dingtang dingtang biaprango wa·alrang kamengkua ine kobor on·aha.
Koborko on·ani gitade, IAF-ni pilot-rang, ia biaprangona bilange chirangko satna jotton ka·engoba balwarang ta·rakan baksana a·arang ga·nangjani a·selo wa·alrangko kimitna gita neng·nikanirangko man·enga.
IAF-ni pilot-rang, Nagalang a·dokni Dimapur a·jaoniko Bambi Bucket-rango chirangko ko·e ia a·brirangona bilange wa·alko kimitna gita chirangko satenga ine kobor on·timgiparang u·iataha.
“Chirangko satanio a·brirara dakani gimin aro balwarang namen ta·rakani gimin neng·nikanirangko man·na nangenga. Ia a·brirango ka·sine bilnade namen neng·ani ong·enga aro wa·alko kimitaniba namen neng·ani ong·enga,” ine kamoni neng·takgimin IAF-ni pilot, kobor ra·timgiparangna parakataha.
Ia biapo wa·al kamenggipako kimitna gita Nagaland sorkari, IAF-ni dakchakaniko bi·ataha aro uandaken IAF-ni helicopter bolbri ia biapo wa·alko kimitna jotton ka·enga ine kobor on·aha.
Ia biapo dakchakanirangko on·na gita Sukrobar salon, National Disaster Response Force (NDRF)-ni sak 48 sipairangko Guwahati-oniko rimbaaha ineba u·iataha.
Salgni skangsan, wa·alrang Manipur a·doko chubatsranggipa Mount Asli a·bri badebaengaha ine Manipur a·dokni Chief Minister N Biren Singh parakatahachim.
Iani bidingo ma·mongni Union Home Minister Amit Shah-ba koborko ra·e, Manipur a·dokni Chief Minister-na pilak nanga dakchakanirangko on·na gita ku·rachakaniko on·ataha aro ia wa·alko kimitanio pilak nanga dakchakanirangko on·china gita Army aro Assam Rifles dolrangkoba didiataha.
Apsan daken, Nagaland a·dokoba ia wa·alko champengsona gita State Disaster Response Force (SDRF), Police, Forest aro dingtang dingtang department-ni volunteer-rangko kam ka·atenga ine kobor on·aha.
Ia Dzukou a·kaweara ong·telaigipa sam bolrangna, do·o matrangna aro uandaken buring bolgrimna mingsing minggamgipa biap ong·achim aro ia biapo salbrina skangan wa·al kamchakatahachim ine nikna man·a.
