Tura, Feb 5: Chatro chatrirangni scholarship aro sorkarini dingtang dingtang kamrangna da•o Aadhar nombor-ko nangchongmotna siengahaoba East Garo Hills a•jao Aadhar-na biming segatani 55 percent-san ong•kuengani gimin East Garo Hills a•jao songdongenggipa pilak manderangkon Aadhar-na biming segatchina gita East Garo Hills a•jani Deputy Commissioner Swapnil Tembe didiataha.
“Ia sal somoirango an•ching sorkarini dingtang dingtang scheme-rangko ra•na gita Aadhar-ko nangchongmotengaha aro mikkangchide chatro chatrirangni scholarship aro sorkarini gipin scheme-rangko ra•na gitaba Aadhar-ko nanggnok. Uni gimin East Garo Hills a•jao songdongenggipa pilak manderangkon anga ta•raken dingtang dingtang centre-rangona re•ange Aadhar-na bimingko segatchina mol•molatenga,” ine East Garo Hills a•jani Deputy Commissioner parakataha.
Deputy Commissioner-ni parakatani gitade, ia Aadhar card-ko mikkangchi chatro chatrirangni scholarship ba stipend-rangna, a•dok sorkarini on•enggipa scheme-rangna Direct Benefit Transfer (DBT)-ko man•na, kamoni neng•takani ja•man an•tangtangni man•gnirangko ra•na, bank account-rangko ta•rakbate kulina aro uandakgipa dingtang dingtang kamrangnaba nangchongmotgnokchim.
Indake ong•engon, East Garo Hills a•jao manderang Aadhar-na bimingtangtangko segatna man•na gita sorkari dingtangmancha centre-rangko, District aro Block level-o donatmanaha aro manderang, ia centre-rangona re•ange bimingtangtangko segatena man•gen ine Tembe u•iataha.
