Tura, March 30: East Garo Hills a•jani Songsak Asil Mindil songo, bilakbegipa bijolini siliting chotani ja•man ka•mao donggipa nokrango ga•akdape Mongolbar pringo ia nokrangko chu•gimik kamgopaha.

Garo Hills-ni bang•bata biaprangon Sombar walo, mikka balwa ta•rakangaha aro uandaken ia songoba mikka balwa ta•rakbaani ja•man sigimin bol, ia bijoli silitingo be•dapaha aro uandakenn ja•mano ia nokrangko wa•al kamgopaha ine kobor on•timgiparang u•iataha.
Ia a•sel ong•ani Mongolbar pring 8:30 bajimango ong•aha aro ua somoio ia song gita ra•sotangenggipa bijolini siliting chotenba, ka•mao donggipa nokrango ga•akdapaha aro ia nokrangko bon•pile wa•al kamgopaha ine u•iataha.

Bijoli siliting ga•akani ja•manoba silitingo bijoli re•kuengani gimin songni manderang mamingkoba dakna man•jaha aro uandaken ia songo komibeoba nok te 9-ko bon•pile wa•al kamaha.

Wa•al kamanichi songni manderang an•tangtangni nok-jamrang baksana ba•ra kancha, tangka paisa, me•dik sam•dik aro noko donggipa pilak gam-jinrangkon gimaatna nangaha ineba kobor on•timgiparang parakataha.