Tura, Oct 27: Budbar attamo, East Garo Hills a•jani Nengpatchi forest gate samba jolo dakait dake ra•enggipa manderangoni saksako East Garo Hills a•jani police-rang rim•na man•aha.
East Garo Hills a•jani Superintendent of Police (SP) Bruno A Sangma-ni u•iatani gitade, Nengpatchi forest gate-o dakait dakenga ine Dobu jolo songdongenggipa manderang Dobu OGC-ona koborko on•ataha aro ja•mano iani bidingo Rongjeng police station-ona u•iatskaenba Rongjeng police station-ni sipairang bakan Nengpatchi-ona re•angaha.
Police-rang ua biapona sokangon, dakait dakgipa manderangoni saksa, ua biaponi bike-o Dobu-chipakna sale katna jotton ka•ahachim indiba Dobu Bazar sambao uni bike ga•akani ja•man ia mandeko police-rang rim•na man•aha ine SP u•iataha.
Rim•ako man•gipa mandeara Williamnagar-oni Roby R Marak minggipa mande ong•achim aro uko police-rang sing•sandikuna gita Rongjeng police station-ona rimangaha ineba SP parakataha.
East Garo Hills a•jani SP Bruno Sangma-ni u•iatani gitade, ia apsan dolni manderangan Mongolbar walni 12:00 bajimango Nengpatchi jolo dongsoe, ia rama gita re•pakangenggipa manderangoniko ma•manti gamchatgipa bosturangko ra•seke ra•ahachim.
Indake ong•engon, police-rang da•o ia dolni gipin membor-rangkoba rim•na gita sandienga ine SP parakataha.
Photo: Budbar attamo East Garo Hills a•jani Nengpatchi songo dakait dakanina rim•ako man•gipa mande saksa.
