Shillong, June 24: East Jaintia Hills a·jani Umpleng jolo donggipa Krem Ule-ni koela a·kolo gimaenggipa manderangoni saksani manggisiko Bristibar salo, Indian Navy-ni chi ripgiparang nikenba ja·mano ra·ongkatna man·aha.
Ia koela a·kolni chirangko NDRF aro SDRF-ni sipairang adita salope galani ja·man Navy-ni chi ripgiparang, koela a·kolchi napangenba ia manggisiko ra·ongkatna man·aha.
Re·anggipa May jani 30 tariko Sutnga Elaka-ni koela a·kolo dynamite boma gopretani ja·man rang·san ia koela a·kolo chi napenba ia koela a·kolo koela bikotenggipa sakbonga manderang gimaahachim aro saksani manggisikode re·anggipa June 16 tariko ra·ongkatna man·skaahachim.
Skanggipa mandeni manggisikode da·onan darangba ra·eskakujaengachim.
Ia koela a·kolo gimaenggipa manderangoni sakgnini manggisikode da·o ra·ongkatna man·ahani gimin koela a·kolo da·o sakgittam dongskakuengachim.
Bristibar salo man·gipa manggisikoba ja·mano Executive Magistrate-ni gita nanga kamrangko matchotate, post mortem ka·na gita Khliehriat-ona watataha aro ia manggisiko man·ani bidingo Assam aro Tripura a·dokni police-rangnaba kobor on·ataha.
Koborko on·ani gitade, ia koela a·kolo gimagipa manderangko NDRF, SDRF, DDRF, Indian Navy aro dingtang dingtang dolrangoni sak 50-na baten sipairang sandiengachim.
