Shillong, June 5: Sonibar salo, Meghalaya High Court-ni Chief Justice Sanjib Banerjee, Meghalaya a·dokni Law Minister James PK Sangma-ni mikkango, East Jaintia Hills a·jani Khliehriat-o gital rikgipa District & Sessions Court-ni building-ko nokdonggae on·angaha aro ia court building-ko nokdonggae on·anganio Meghalaya High Court-ni Judge, Justice HS Thangkhiew, Meghalaya High Court-ni Judge, Justice W Diengdoh, Law Secretary CVD Diengdoh, Advocate General Amit Kumar aro gipin official-rangba dongpae bak ra·angtokaha.
Ia gital court building-ko nokdonggae on·angani somoio Meghalaya High Court-ni Chief Justice Sanjib Banerjee, jinmana aganprakangengon, ia gital court building-ko man·ahani gimin East Jaintia Hills a·jani manderangna an·tangni kusi ong·chakaniko parakangenba, ia gital court building-ko judiciary-oniko ma·ekate ta·raken rike on·ahani gimin a·dok sorkariko mittelpilangaha.
Ia tom·anio Meghalaya a·dokni Law Minister James PK Sangma-ba jinmana aganprakengon, kachariara mongsongbatgipa kamko ka·gipa ong·ani gimin Meghalaya a·doko ainni kamrangko mangrakbatatna gita sorkari, pilak nanga dakchakanirangko Meghalaya High Court-na on·angkugen ine ku·rachakaniko on·angaha.
Meghalaya a·doko National Law College-ko rikna gita sorkari kamrangko ka·engaha ineba ia tom·anio a·dokni Law Minister parakataha.
Tom·a matchotani ja·mano, Meghalaya High Court-ni Chief Justice Sanjib Banerjee, Meghalaya a·dokni Law Minister James K Sangma aro gipin official-rang baksa District & Sessions Court campus-o bol chararangko ge·angjolaha.
