Shillong, July 14: East Jaintia Hills a·jani Khliehriat police reserve-o IED bomako gopretanio jak donga ine Hynniewtrep National Liberation Council (HNLC) parakataha.
“Khliehriat-ni police reserve-o IED bomako HNLC gopretaha ine chinga a·kangenga. Chingni manderangko so·ote galahani gimin police department-ni kosako a·jak sokna gita chinga bomako godapaha,” ine HNLC-ni general secretary aro publicity secretary Sainkupar Nongtraw, Budbar salo parakataha.
Police-rang Garo Hills-o bobil dake chakatgipa dolrangko bon·atna man·aba gnang indiba HNLC dol baksa dakgrikanide altua kam ong·jawa ineba Nongtraw parakataha.
Meghalaya a·dokni minister-rang, MLA-rang, dal·dalgipa bading chiwalgiparang aro gipin dilgiparangko biltangtangko jakkalsretjachina gita HNLC mikrakataniko on·angaha.
East Jaintia Hills a·jani Brishyrnot-o rong·chun bikotaniko dontongchina gitaba HNLC, Star Cement company-na mikrakataniko on·angaha.
