Shillong, September 8: East Jaintia National Council uamangni dingtang dingtang dabienggiparangni bidingo jinmana u•iatna ine Bristibar salo kobor ra•timgiparangna parakataha. Uamangni mongsonggipa dabienggiparangara, damgni residential skul aro damsa teachers training centreko Jaintia hillso songe on•anian ong•a jekon uamang 2020 bilsionin sorkario mol•molengachim. “A•dok sorkari mikkang nitemanchae kam ka•enga.
Chinga 2020 bilsionin chingni districtna ia nangenggiparangko dabienga indiba sorkari knachakjaenga. Bang•bata salrangon chinga ia residential skul aro teachers training centreni bidingo memorandumrangko on•manaha indiba sorkari iako namrengaha” ine East Jaintia National Council ni padot Sambormi Lyngdoh koborna janapaha.
Garo Hillsnade M.ed aro me•a-me•chikni hostelrangko Suporting Human Capital Development Schemeoniko kam ka•e on•aha. Garobadhaoni Rajabalaona rama tarina tangka gong crore 50 ko North East Special Infrastructure Development Schemoniko tarie on•manaha, indioba Jaintia Hills districtni rama-jal•angrangko tarichina 2021 bilsioni watgipa memorundumrangko on•manahaoba maming nama koborkon man•kujaenga” ineba East Jaintia National Council ni dilgipa aganaha.
“Jaintia Hills an a•dok sorkarina incomerangko bang•bate on•enggipa ong•a, indioba sorkari chingko galchipskaenga, unigimin sorkari aro skotong minister chingkoba nichanghalpajachina” ineba ua janapangkuaha.
