Shillong, May 28: East Khasi Hills a·jao COVID-19-ko man·giparang komikujaengani gimin aro salantian COVID man·giparang batroroangengani gimin lockdown-ko re·baenggipa June 7 tarikona ra·dodapattaiaha.
“East Khasi Hills a·jao COVID man·giparang komikujaengani gimin chinga lockdown-ko re·baenggipa June 7 tarik pring 5:00 bajiona ra·dodapattaiaha,” ine Sukrobar salo a·dokni Deputy Chief Minister Prestone Tynsong, kobor ra·timgiparangna parakataha.
Deputy Chief Minister-ni parakatani gitade, June 7 tarikona lockdown-ko ra·daodapattaiahani gimin East Khasi Hills a·jani pilak biaprangon a·bachengo sorkarini dongimin niamrang, jekai a·ja damsaoni damgipinona re·ruraaniko champengani, a·dok damsaoni damgipinona re·ruraaniko champengani, skatang nokoni ong·kataniko champengani, nangchongmotgipa aro sam dokkanrangna agre gipin dokkanrangko kulina on·gijani aro uandakgipa niamrangko ja·rikangkugen.
East Khasi Hills a·jani dingtang dingtang gittimrangona manderangni nangchongmotgipa bosturangko sokate on·na East Khasi Hills a·jani Deputy Commissioner, niroke kamko ka·anggen.
Central aro state office-rangko Personnel department-ni u·iatgimin office-rangna agrede pilak office-rangkon chipe donangkugen.
Bank-rangko May 31 aro June 1 tarikrangode nanga gita kam ka·giparangko okamate kulina man·gen indiba bank-rangko attam 4:00 bajion chipna nanggen ine Deputy Chief Minister parakataha.
Post office-rangkoba June 2 tarikoni June 4 tarikona DC-ni dongimin niamrango pangchake aro bang·gija kam ka·giparangchi kam ka·na on·anggen ine Deputy CM parakataha.
Mande sianirango district administration-oniko permission ra·chengenba sak 10-na bate tom·na man·jawa.
