Shillong, Nov 10: West Khasi Hills a•jaoniko ma•ekatenba gital bikotgipa Eastern West Khasi Hills district-ko Budbar salo, Meghalaya a•dokni Chief Minister Conrad K Sangma, nokdonggae on•angaha aro ia gital district-ko nokdonggae on•angani somoio Meghalaya Legislative Assembly-ni Speaker Metbah Lyngdoh baksana gipin cabinet minister-rang aro MLA-rangba dongpae bak ra•angaha.
Mairang civil sub-division-ko 1976 bilsini November 10 tariko songahachim aro uandaken da•o bilsi 45-ni ja•man ia apsan salon ia sub-division-ko district-ona ra•doatskaaha. Ia gital district-ni ning•o Mairang aro Mawthadraishan C&RD Block-rang donggen aro ia gital district-ni headquarter Mairang ong•gen.
Ia gital Eastern West Khasi Hills a•jako nokdonggae on•angani somoio a•dokni Chief Minister, jinmana aganprakangengon, ia gital district-ko bikotanichi jolo songdongenggipa manderangna sorkarini kamrangko sepangbatatgnok ine parakangaha.
Ia gital district-ko bikotaniara jolo songdongenggipa manderangni ru•utbea bilsirangna nangnikani ong•achim ine janapatengon, dingtang dingtang niamrangko nichengesa sorkari ia gital district-ko bikote on•na man•aha ine Chief Minister parakataha.
Uni opposition dolko dilengmiting somoio Mairang-ona re•baani somoion ia gital district-ko bikote on•na nangengani gimin jolo songdongenggipa manderangna una aganatahachim ineba Sangma aganaha.
Ia gital district-ko sorkari, Khasi Hills-o, Jaintia Hills-o ba Garo Hills-o ong•a inede bikote on•jaha indiba ia jolrango pilakni gitan namroro silroroanirang dongjaenga ine nikesa dingtang dingtang niamrangko ja•rike bikotaha ineba Chief Minister parakataha.
Manderangni nangnikanirangko chu•sokate on•anian MDA sorkarini mongsonggipa daito ong•a ineba ia tom•anio Chief Minister parakataha.
Chief Minister ong•e uni maiba namroro silroroatani kamrangko a•bachengate on•on a•dokni gipin bakrango pangnan uko mikkang nitee kamko ka•enga ine matnangronga indiba MDA sorkari, darangnaba mikkang niteani grisa kamrangko chu•sokate on•enga ineba Sangma parakataha.
“Khasi Hills-o anga maiba namroro silroroatani kamko a•bachengate on•ode Garo Hills-o iako ong•gija dake ra•ronga aro Garo Hills-o anga maiba kamrangko a•bachengatode Jaintia Hills-o uko ong•gija dake ra•ronga indiba ripengrang anga na•simangna iako talate on•na ska…ia MDA sorkaride jat, torom ba biapko basegipa sorkari ong•ja aro chingade Khasi, Garo aro Jaintia Hills-ni gisepo maming dingtanggrikatani dongja. Banoba namdapataniko nangenga ong•ode ua biapo chinga pangnan namdapataniko ra•bana kamko ka•enga,” ine Sangma aganaha.
Ia gital district-ko Eastern West Khasi Hills ine mingani gimin talate on•angengon, ia gital district-ko biming mingna gita sorkari dingtang dingtang dolrang aro manderang baksa agangrikchengesa mingaha ine Chief Minister parakataha.
“An•chingni songsalara me•chikchiko ra•gipa songsalsa ong•ani gimin ia gital district-ko biming minganio gitcham district-ni bimingkoba man•chapatna chinga nangnikaha. Uni giminsa ia jolrangara West Khasi Hills a•jani salaramchipak ga•akani gimin chinga Cabinet-ni gita tom•enba ia gital district-ko Eastern West Khasi Hills mingna tika ka•aha,” ine Sangma aganaha.
Ia gital district-ko nokdonggae on•anio Meghalaya Assembly-ni Speaker Metbah Lyngdoh-ba jinmana aganprakangengon, ian ia jolrango songdongenggipa manderangna gisik ra•ani sal ong•kamgen ine ia jolrango songdongenggipa manderangni dabianiko knachakahani gimin Chief Minister Conrad Sangma-ko aro a•dok sorkariko mittelpilangaha.
