Shillong, Nov 9: Meghalaya a•doko dam 12-gipa district-ko kulina Meghalaya Cabinet, re•anggipa November 5 tariko ra•chakmanani ja•man, ia gital district-ko ‘Eastern West Khasi Hills’ ine mingna tik ka•aniko Hynniewtrep Youth Council (HYC) Northwest circle jegalatenba, ia bimingko dingtangatchina a•dok sorkariko didiangaha.
Mairang sub-division-ko district songna gita sorkarini ra•chakangani ja•man ia gital district-ko ‘Eastern West Khasi Hills’ ine mingna tik ka•aniko social media-rangoba manderang jegaltokengachim ine nikna man•a.
Indake ong•engon, Mairang sub-division-ko district songchina dabiani da•o be•en pil•na man•engahani gimin HYC Northwest circle, Mairang-ni MLA Metbah Lyngdoh aro Nongstoin-ni MLA Brolding Nongsiej-ko mittelpilangenba, ia gital district-ni bimingko ‘Eastern West Khasi Hills’ minggija gipin bimingchi mingskachina sorkariko didiangaha.
