Shillong, Sept 28: School-ni principal Aiom Ksiar Diengdoh-ni kosako jegalenba, re·anggipa September 6 tariko gisim ba·rani nisan baksa skigiparangni skulo jingjengatangani bidingo a·dokni Education Department, mija Mongolbar salo Shillong, Pine Mount School-ni skigiparangna show cause notice ba iana talataniko on·china gita lekka sokataha.
Indake ong·engon, Pine Mount School-o skigiparangni apoti ka·anirangko aro uamangni chagrongenggipa neng·nikanirangko sandirokatna gita a·dok sorkari, re·anggipa September 7 tariko sakbri manderangko seoke ge·sa enquiry committee-ko songahachim ine gisik ra·atna gita man·gen. Committee-ko dilna gita, education department-ni secretary R. Rapthap, IAS-ko seokangaha.
Ia committee, Pine Mount School-o skigiparangni pilak chagrongenggipa neng·nikanirangko sandiataha aro uamangni sandiate man·ani aro agan-kupattiani report-rangko a·dok sorkarina on·anggen.
Iani bidingo skigiparangni matnange aganani gita, skulni somoio Principal pangnan uni office-o dongrongjachim aro iani a·selan skulni nanganirangna aro poraiengipa bi·sarangni namgnina agan-chanchigrikna uamang cholko man·breja.
Iani gisepon, skulo poraigipa chatro-chatrirang, skulna nangchongmotgipa toilet-rangko aro minggipin nanganirangko on·china, laboratory, classroom-o nokking selanirangko taridape on·china, aro library, computer-rang aro skulo minggipin jakkalani bosturangko chu·onga gita on·china gita sorkario dabiangaha.
Educational rights ba skie ra·anio pilak man·na nangani bilrang donggenchimoba, uamangni skulo bang·a skie ra·ani dingtang dingtang dakgipa cholrang donggijani giminba skulo poraienggipa chatro-chatrirang an·tangtangni suk ong·gijanikoba parakangtokaha.
