Williamnagar, December 11: Williamnagar-o damsa niksenggipa Educere Higher Secondary School-o gital rikdapgipa skichakram kuturiko Sombar salo, Tura-ni MP Agatha K. Sangma, East Garo Hills-ni Deputy Commissiner Vibhor Aggarwal, Samanda C&RD Block-ni BDO Tochri R. Sangma aro gipin niksenggipa dilgiparangni dongpaanio oprake on•angaha. Ia skichakram kuturiko Chief Minister’s Special Development Fund Scheme-ni ning•o rikahachim.

Tom•anio school-ni Principal Gamchi Timre R. Marak, ia school-ni ong•baani gimin talatangenba, ia scheme-ko on•e skulna dakchakahani gimin Tura-ni MP Agatha K. Sangma aro Meghalaya a•dokni skotong minister Conrad K. Sangma-ko mittelpilangaha.

Samanda C&RD Block-ni BDO, Tochri R. Sangma, sorkarini on•atgipa ia scheme-ko name jakkalahani gimin School-ni principal-ko mittelpilangskaaha aro sorkarini pilak kamrangon Educere School-ni chatro-chatrirang dongpae bakko ra•aninaba ua East Garo Hills District Administration-ni pal mitteljolangaha.

Ia tom•anio, East Garo Hills-ni DC Vibhor Aggarwal, ia scheme-rangko ra•bae chu•sokatna man•aniara Skotong Minister Conrad Sangma aro MP Agatha K. Sangma-ni rakbee kam ka•ani a•selsa chu•sokaha ine agane, Garo Hills-ni pilak biaprangon MP Agatha K. Sangma-ni kam ka•ani chinrangko bang•en nikna gita man•enga ine aganangaha.

Tom•anio mongsonggipa sokgipa ong•e aganprakengon, Educere School-o lekka porako on•ani bewalna skulko mittelpilangenba, Garo Hills-ni gipin school-rangba apsan daken ia namgipa bewalrangko ja•rikna man•genchimode nambatgenchim ine Tura-ni MP Agatha K Sangma aganaha.

Ia tom•anio school-ni chonchongipa chatro-chatrirang uamangni git ring•anichi aro chrok-mesaanirangchi jinmako an•saowatangaha.

Iakoba poraie nina man·gen: Dokprete ra•gipa saksa police-ni goanichi sia