Williamnagar, Nov 04: East Garo Hills a·jani District Commerce and Industries Centre, bilsianti ong·atrongenggipa Annual District Level Industrial Exhibition 2022-ko ia jani 3 aro 4 tarikrango ong·atangaha, uandake Sukrobar salni programo, Commerce & Industries-ni Joint Director, Baghmara-ni District Commerce & Industries Centre (DCIC)ni General Manager baksana Meghalaya Handloom and Handicraft Development Corporation, Shillong-oni officialrangba re·bae bakko ra·angtokaha.
Ia programni bidingo Williamnagar-ni District Commerce and Industries Centre-ni Genaral Manager Moshe R Marak-ni koborna talatengengon, bilsio changprak ong·atrongenggipa exhibition-o East Garo Hills a·jaoni dingtang dingtang changa-sapanirangko jakkale nokdangko chalaienggipa manderang uamangni sol·a-repani, wata-chengani, ba·ra dokani aro ba·ra sikani bosturangko ra·bae exhibition-o mesokangaha ine talataniko on·angan baksa, ia exhibition-ara saksa-sakgipinni u·ianirangko aro changa-sapanirangko sualgrikna aro on·grikna gita namgipa biapba ong·jola ineba ua agandapataha.
Ia programona dingtangmancha ong·e sokbagipa officialrang, exhibition-ona manderangni ra·bagipa dingtang dingtang bosturangko kragipa damrango breange uarangko Guwahati aro gipin dal·dalgipa songjinmarango donggipa Meghalaya Emphorium-rango done mesokangskagen ine Pa Marak parakataha.
