Rongjeng, Feb 6: Chisak jolni daka rikani bewalrangko mikkangchi name ripingangkuna miksonge ‘Chisak Festival’-ko da·al February 6 tarik Sonibar salo, Garo Students Union (GSU) Rongjeng regional unit, Rongjeng-ni Nongchram Don Bosco School kal·chakram biapo ong·atangaha.
Ia Festival-ko a·bachengatani somoio GSU Rongjeng Regional Unit-ni president Rattu M Sangma, festival ba maniani miksonganikoko agan talate on·angaha.
Garo Hills-ni salaram jolrango songdongenggipa A·chikrangni dakbewal rikbewalrangko name ripingangna aro chadamberangni changa sapanirangko ra·dona, jatni pilak daka rikanirangko chasongni chasongna gimagija rakkiangna miksonganio skanggipa changna ia Chisak Festival-ko ong·ataha ine GSU Rongjeng unit-ni president ia tom·anio parakataha.
Ia manianiko ong·ataniona Darugre elakkani gitcham MDC Mettrinson G Momin dal·batgipa sokgipa ong·e, jinmana aganprakengon, Chisak ku·sikni gimin agan-talate on·angan baksana ia manianiko ong·atahani gimin GSU dolko demittele aganangaha.
Ia Festival-ko ong·atanichi jolni chadamberang mikkangchi jatni pilak dakbewal rikbewalrangko daksninge chu·sokgipa ong·china aro Chisak jolrango maiko daka rikachim aro maiko ja·rikna nangachim pilak jatni dakbewalrangko name ja·rikangchina gitaba ua didiangaha.
Unbaksana jolni dal·drobaenggipa chadamberangko, an·tangtangni changa sapanirangko nambata gadangona ra·doangchina aro Chisakni daka rikanirangko name ripingangchina gitaba Momin jolni chadamberangko didiangjolaha.
