Shillong, Feb 8: East Garo Hills a•jao a•dok sorkarini rike on•gipa dingtang dingtang project-rang, chong•motan Williamnagar Govt College-ni Academic Block, Girls Hostel, Boys Hostel, Mini Outdoor Stadium aro Entrepreneurship Promotion Development Program-ni ning•o Williamnagar-o gital rikgipa Entrepreneirship Cell-ko Bristibar salo, Meghalaya a•dokni Chief Minister Conrad K Sangma, a•dokni PHE Minister Marcuise N Marak, Rongjeng-ni MLA Jim M Sangma, Amlarem-ni MLA Lahkmen Rymbui aro a•dokni Chief Secretary DP Wahlang-ni dongpaanio, nokdonggae on•angaha.
Ia gital rikgipa nokrangko nokdonggae on•anganio a•dokni Chief Minister, jinmana aganprakengon, Williamnagar College-ko rikanio jak donggipa pilak manderangkon mittelpilangaha.
2018 bilsioni Meghalaya a•doko dingtang dingtang skul aro college-rangko rikna aro namdapatna gita a•dok sorkari, gong crore 500-na baten koros ka•aha ine talataniko on•angengon, Williamnagar College-ni Academic Block aro chatro chatrirangni hostel-rangko nokdonggae on•na man•ahani gimin Chief Minister, an•tangni kusi ong•aniko parakataha.
A•doko chadamberangna janggi tangani chol aro an•tangtangni changa sapanirangko mesokna sorkarini ra•gatgipa dingtang dingtang program-rang, jekai Prime Entrepreneurship, YESS Meghalaya, CM Elevate, Meghalaya Games, Grassroots Music program aro uandakgipa program-rangni gimin janapatengon, mikkangchide Williamnagar aro Resubelpara gita dakgipa jillarangba Meghalaya Games-ko sokachakna man•na nanggnok ine Sangma aganaha.
Uni gimin Williamnagar MLA-ni bi•ani gita Williamnagar Mini Stadium-o Track & Field stadium-ko rikna tangka paisarangko chame on•gen ine Chief Minister parakataha.
Williamnagar Govt College-ko nambatatna gita rakbate kam ka•china college-ni principal aro skigiparangko didiangengon, Williamnagar, Baghmara aro Sohra Govt College-rango Scienct aro Commerce stream-rangko a•bachengna gita bakan cabinet ra•chakanggnok ine Chief Minister parakataha.
WATCH:
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
