Shillong, July 21: A·song ge·sa-ge·gipin baksa bobil ong·grikoba toromni gita meligrikataniko man·enba, mijal Butbar salo Muslim toromko ra·giparangni Eid-Al-Adha-ko maniani salo, Poonch district-ni Poonch-Rawalakot Crossing Point-ni Line of Control-o Mendhar-Hotspring Crossing Point-o Indian Army aro Pakistan Army-rang chi·gipa cha·anirangko on·grike apsan maniangtokaha.
A·song damgnini gisepo chandal mittugrikaniko dakangani ja·man iandake a·song damgnichipakni sipairangni apsan manianganiara mikkangchi a·song damgni meli-nangrime donganiko kim·kimatani gita ong·a ine nikatna man·gen.
Ia manianio, dolgni sipairangan tom·tomani aro kusini nama-sikanirangko sak-sakgipinna on·griktoka baksana, iandakgipa namgipa kamko paktangtangchini Army-rang kusi ong·been ra·chakangaha.
Indake ong·engon, mikkangchiba a·song damgnini sipairangni gisepo meli-nangrimaniko aro ka·dongrikaniko ra·bakuani giminba ka·dongsona gita man·enga.
