Khliehriat, Nov 22: Star Cement Ltd-ni a·ningni gamko bikotaniko apalbatatna chanchie ra·bagipani bidingo mijal Sonibar salo salaram Jaintia Hills district-ni Khliehriat-o jinmani mamlako kachario knatimangani somaio jegalgiparangni golmalko ong·atanina a·dok police iana mamlako segatangaha.
Jingjengatao, golmal ong·gitikango komibeoba sak-sni police personnel saknaa man·tokaha. “Iana chinga mamlako segataha aro sandirokataniko dakatenga,” ine Assistant Inspector General of Police (A), Gabriel K Iangrai mijalo koborna u·iataha.
Iani bidingo police-ni aganani gitade, pring 7.30 bajimango Narpuh jolni ning·ogipa Shymplong songoni mande jinma aro dingtang dingtang organization-rang jekai EJNC, HYC, STIEH, KSU aro FKJGP-ni adita sak memborrang jinmani mamlako knatimaniko ong·atnasigipa biap sambaona tom·dakbatokaha.
A·bachengode, uamang district administration-ni officialrang baksa agangrikaha, jeni ja·man jegalenggipa doloni sak 50 memborrangko jinmani mamlako knatimanio bakko ra·angna gita bilko on·aha. Indake ong·oba, mamlako knatimaniko jegalgiparang doloni bang·barikrikani gimino, mamlako knatimanio uamangoni bang·bata memborrangkon bak ra·na cholko on·china gita dabiani ku·rangrang gam·roroskaaha.
Mande jinma tom·dakgiparangni dabianiko a·bao donggipa officialrang on·na jechakahani gimino, mande jinmaan rang·san golmalrangko ka·nasa a·bachengaha jeni a·selo mande jinma tom·dakaniko katbildangatna gita alamila bilrangko jakkalna gita draataha, ine Iangrai aganaha.
Indake mikkanggrikmitingo, uniform-o ong·gipa sipairang gimik sak-snioni saksa me·chik constable-ko man·chape aro jinmachini baditaba sak manderangba adita mata-bu·arang man·tokaha ine agane, jinmani mamlako knatimenggipa biapchipakna, agan-torie golmal ka·na mande jinma napdraangmitingosa obostang namjabatroroaha ine ua agandapaha.
Indakmitingo, obostani namroroangjaienganiko official-rang u·ienba, jinmani mamlako knatimaniko dakangna man·jawaha ine tom·dakenggipa jinmana aganprakataha. Officialrangni aganprakatako knaani ja·manosa mande jinmaan ka·sinsin re·bildangangtokaha, ine ua koborna agandapataha.
