Shillong, Sept 14: Nongthliew songoni re·baenggipa bolsa Mahindra Max (ML 05 7947) gari, Butbar salo Assam-ni trak bolsa baksa chapekgrike East Khasi Hills-ni ning·ogipa Mawkriah songo a·sel ong·aha.

Assam-ni trak (AS01 KC 8932) unomiting bajar-anti damona me·su-samjakrangko gapkete gatenba Assam-chipakni Shillong-ona re·baengachim, indake Mawkriah jolona sokosa ia a·sel-obosta ong·aha ine koborko man·soaha.

Max gario re·bagipa sakgittam manderangni aganani gitade, uamangni ki·sango re·enggipa gari bolsana re·angchina gita wate on·ahachim indiba bostu jrima dongani gimin aro ta·rakani gimin gariko salgipa sason man·jae uamangni Mahindra Max gariko su·gakeaha.

Iani giseopon, trak gariko salgipa ua biaponi kataha aro Mahindra Max gariko salgipade bilongbee mata-bu·ako man·aha, indiba rasong gnange apan gapagipa gipinrangde bang·gijasan saknaa man·tokaiaha aro uamang gimikkon sambajolni sanram biapona rimangaha ine koborna u·iataha.