Shillong, Feb 21: Gipin biaprangchini re·bae dingtang dingtang a·dokrango kam ka·e cha·enggiparangna mongsongbate rang·speani cholrangko on·angna miksongenba, mikkangchina re·chakatanio aro a·songo songdongenggipa vote pu·ongiparangni namgnina chel·ao donge vote-rangko pu·onatna man·ani cholko India-ni Election Commission dake-ka·e niangchengna gita ja·ku de·chakatna chanchienga.
Election Commission-ni iako a·songona ra·baengani gimin adita talatanganio, eleksinna skang, eleksin ong·mitingoni eleksin matchotaona kingkingan dingtang dingtang bimango chasongni kri technology-ni bilrangko jakkalaniode a·songni election commission namen jakskangaia ine agane, chel·ao dongeming vote pu·onatna man·ani cholko a·bachengna chanchianio EPIC-ko a·bachangataniba iana ja·kusa ga·ani gita ong·a, uni gimin iani chu·sokani maidake aro basako ong·gen uko mikkangchi nie u·ie-ra·angna gita man·gen ine Meghalaya-ni Chief Electoral officer Pa Fredrick R Kharkongor aganaha.
Chel·ao donge pu·onatani cholko ba remote voting-ko mitam a·songrang jekai Estonia-o, jeon politicalni bidingode namen nama aro chu·onga gita nangarang donggipao dake niangmanaha, jekon an·chingni a·songoba iako dake niangani namgipa chanchia ong·a, indiba a·songo dakna nanggni kamrang aro ja·rikatna nanganirang bang·en dongani gimino dingtangatanirangko bang·en nangtaiskagen ineba ua taldapataha.
A·songo, eleksinni kamrango dingtangataniko ra·baengani gimin aganengon, “RP act (Representation of people act)oniko a·bachengode paper ballot box-ko jakkalaniko an·ching nikangna gita man·aha, uni ja·man technical committee-ni porikka ka·e niangani ja·man EVM-rang aro VVPAT-rangko jakkale nianiko uamang agan-ku·pattiaha. Iarang gimiknan che·em-che·em porikka ka·e niatanirangko dakchengna nangaha aro pu·onani biaprango iako dake-ka·e niangchengaha. Apsandake, remote voting-naba uandakgiparangko ja·rike dake-ka·e niangchengna nangao ga·aknaba donga uni ja·manosa ua maidakgipa namgniko on·a aro ia gital ra·baenggipa bostuchi maidakgipa gamchataniko on·anggen, ja·mano iako ma·sie ra·angna,” ine Pa Kharkongor talataha.
Janapjolna gita, ia bilsi January jao chang 11-gipa National Voter’s Day-ko maniani somoio, Election Commission-ni ra·baenggipa remote voting project-ko ru·utgijan a·bachengatgen ine Chief Election Commissioner Pa Sunil Arora aganangaha.
Iako a·songo dake-ka·e niangna miksonga donganiko aro EC-ni niksamsoani dongako re·anggipa jao National Voters Day-ni salo television aro radio-rango uni aganangao, Pa Arora parakataha.
“Chasongni kri technology-ni bilko jakkale IIT-Chennai aro gipin niksenggipa institution-rang baksa remote voting ba chel·a biaponi pu·onatani cholko a·songo ra·bana gita project-ko a·bachengataha aro uni namgipa bitekoba nikna man·aha. Iako dake-ka·e nianiko ru·utgijan a·bachenggen” ine ua aganangaha.
Indake ong·engon, Meghalaya a·doko ia project-ko pu·onani a·bao dake niangani donggenma ine sing·on, iani bidingo da·odipet ja·pangoni maming u·iatsoanirang dongkuja, iani giminde anga da·o mamingkoba aganna man·kuja maina ian chanchie nikuenggipa project-sa ong·a ine a·dokni Chief Electoral Officer, Pa FR Kharkongor aganchakaha.
Iani bidingo PTI-o parakatani gitade, ia gital technology-ni bilko a·songo ra·bana gita Election Commission, IIT-Madras baksa ku·mongrime kamrangko ka·ataha jechin biaptangoni namen chel·beao dongenggipa a·songni vote pu·ongiparang uamangni constituency-tangtangni polling station-ona re·bana nangmangijan chel·ao dongen pu·onatna gita cholko man·gen.
