Shillong, Feb 10: Meghalaya Assembly election-ko ong•atanio, Election Commission of India (ECI)-ni gita tangka paisarangko nangana bate jakkaljachina aro ra•bitjachina ge•etaniko on•manahaoba, a•dokni bang•a biaprangon dingtang dingtang dolrangni niam pe•e tangka paisa jakkalaniko aro ra•bitanirangko election official-rang rim•na man•enga.
Meghalaya a•dokni Chief Electoral Officer (CEO) FR Kharkongor-ni u•iatani gitade, Shillong songjinmako man•chape East Khasi Hills a•jani dingtang dingtang biaprangonikoba bang•en tangka paisarangko rim•na man•aha.
Shillong songjinmao aro a•dokni dingtang dingtang biaprango election official-rang, niam pe•giparangko nirikkiengkua ineba Kharkongor parakataha.
CEO-ni parakatani gitade, niam gri tangka ra•bitgiparangko aro tangka sualgiparangko nirikkina gita Election Expenditure Monitoring Team baksana sak 21 central expenditure observer-rangko donmanaha aro uamang baksana deputy commissioner aro gipin election expenditure dolrangba kamrangko dakchakenga.
Apsan daken, ia election-ni somoio election official-rang aro police-rang mikrakbee kamrangko ka•engani a•sel drugs ba pekatgipa samrangkoba bang•en rim•na man•enga ine Kharkongor parakataha.
