Shillong, Feb 13: Re•baenggipa February 27 tariko ong•atenggipa Meghalaya Legislative Assembly election-na skang, Mawlai-ni National People’s Party (NPP) candidate Teibor Pathaw-ko Sombar salo, Meghalaya High Court, dosgri ine parakatenba jakgitel wataha.
Pathaw-ko uni agency-o kam ka•enggipa manderangni Employee Provident Fund (EPF)-ko jakkalsreta ine matnangenba uni kosako mokordoma ka•ahachim aro ia case-ko 2018 bilsion bon•atahaoba ian High Court-ni ning•o ong•gipa legal case ong•e re•anggipa February-ni 10 tariko bon•kamgipa hearing-ko dakna nangahachim.
Teibor Pathaw-ni parakatani gitade, candidate-rangni kosako maiba case-rang donggenchimode, uani bidingo jinmana u•iatchina Election Commission, political dolrangko ge•etmanahani gimin ua an•tangni case-ko ra•galani bidingo Election department-na u•iataha aro iako Election department-ba jinmana u•iatskagnokchim.
Ia case-ni a•selan uni kosako susaenggipa gipin candidate-rang uko matnangna jotton ka•engachim indiba da•o election-na skang uko kacharini jakgitel wataniara Pathaw-na cheani gitaba ong•skaaha.
Ia case-ni bidingo unbaksa susaenggipa gipin candidate-rang uko manderangni mikkango matnangna jotton ka•angkugenchimode ua uamangni kosako kachariona ra•ange dakgrikgen ineba Pathaw mikrakataniko on•angaha.
