Tura, Feb 19: February-ni 27 tariko ong·atenggipa Meghalaya Assembly election-o Congress aro National People’s Party (NPP)-ni giseposa susaani ong·batenga aro West Bengal-ni Trinamool Congress (TMC) dolde da·o election-na skangan bon·angengaha ine Sonibar salo, All India Congress Committee (AICC)-ni national general secretary Mukul Wasnik, Williamnagar-ona re·bae Congress dolni candidate-rangna campaign ka·angani somoio, kobor ra·timgiparangna parakataha.
Ia election-o chegen ine TMC-ni a·kanganiara manderangna dakmikanisan ong·aia ine janapatengon, sawa aro badia manderang TMC-na pu·one bilona watatgen ine Wasnik sing·doataha.
2018 bilsio Congress dolko seokgiparang da·o ia changoba Congress-kon seoktaina sienga ine janapatengon, manderangni kosako chakatenba, Congress dolko wate katahani gimin AICC-ni general secretary, Mukul Sangma aro unbaksa TMC-o napanggipa sak 11 membor-rangko matnangataha.
Wasnik-ni parakatani gitade, TMC dolara Meghalaya a·dok aro salgro salaram jolrango maming nangchakeani grigipa dolsan ong·aia aro iandakgipa dolo napangahani a·sel Mukul aro gipin dilgiparang ia chango ga·akna gita siengachim.
BJP-ara, a·songko bak dakna aro a·songni jakgitelaniko pe·na jotton ka·enggipa dolsa ong·a ineba ua, Garo Hills-ni manderangko mikrake dongchina didiangaha.
