New Delhi, July 1: Europe-ni damsku a·songrang India a·songo Serum Institute-ni tarigipa Covishield-ko ra·chakaha aro ia a·songrangara Austria, Germany, Slovenia, Greece, Iceland, Ireland, Spain, Estonia aro Switzerland a·songrang ong·a ine Bristibar salo kobor on·timgiparang parakataha.
Europe-ni European Medicines Agency (EMA), da·o dipet mingbri tikarangkosan ra·chakengkua aro uarangara, Pfizer-BioNTech-ni Comirnaty, Moderna-ni Covid vaccine, Europe-o tarie Vaxzervria ine palskagipa AstraZeneca aro Johnson & Johnson-ni Janssen ong·achim.
COVID giproroengmiting somoio ia tikarangko su·gipa manderangkosan Europe a·songrango maming neng·nikani gri songre-songgabatna aro vaccination passport-rangkoba on·aiachim.
India a·songo Serum Institute of India-ni Oxford University baksa bakrime tarigipa Covishield aro AstraZeneca tikarangde EMA-ni list-o dongjachim aro apsan daken Bharat Biotech-ni Covaxin-ba ia list-o dongjachim.
Europe a·songo dongimin niam gitade, India a·songoni Europe a·songrangona songreangenggipa manderang, je manderangan Covishield ba Covaxin tikarangko su·achim, ua a·songrango ia tikarangko ra·chakkuja ong·ode quarantine-ko dakna nangachim.
Indake ong·engon, India a·songoni songreangenggipa manderang quarantine ba dingtang nape dongna nangjana gita India a·songba gipin a·songrang baksa songgigrikaniko dakgen ine Budbar salo Foreign ministry-oni kobor on·timgiparang parakataha. Uandaken da·o India a·songo Covishield ba Covaxin tikarangko su·e Europe a·songrangona re·angenggipa manderangko European Union, quarantine daka gri ra·chakkujaskalde Europe a·songrangoni re·baenggipa manderangba India a·songo quarantine dakna nangtelskaengaha.
Europe Union-o samna niam dongimin dolrang, adita antirangni gisepon Covishield-ko ra·chakgen ine Serum Institute-ni CEO Adar Poonawalla-ba Budbar salo, an·tangni ka·dongchakenganiko parakataha.
Re·anggipa jaosan, G7 a·songrangni health minister-rangni tom·bimonganio India sorkari, ia ‘vaccine passport’-ko jegalangahachim ine nikna man·a.
