Shillong, April 3: 2013 bilsionin dal•drobaenggipa bi•sarangko naljokanio rakkina kamko ka•enggipa Faith Foundation-ni bilsi 10 gapaniko maniani bak gita Sombar salo, ‘My Safe’ Campaign-ko Shillong songjinmani Meadow Hall-o a•bachengataha.
Ia Faith Foundation-ko Khasi jatni dolsa me•chikrang, bi•sarangko naljoke rakkina aro bi•sarangni gisepo dilgiparangko ong•katatna miksonge bikotahachim.
Faith Foundation-ko bikotani aro uamangni kamrangni gimin Faith Foundation-ni co-founder aro director Shannon Dona Massar, kobor ra•timgiparangna talate on•angengon, bi•sarangni namgnina ma•a paarang, skigiparang aro gittimni manderang baksa kam ka•na nangengani gimin aganangenba, a•dokni pilak skulrangon, ‘Personal Safety Education’-ko ra•gatchina a•dok sorkariko didiangaha.
Batanggimin bilsi 10-ni gisepo, dingtangmancha bi•sarangni namgnina kamrangko ka•ahani gimin ia Faith Foundation-na Global Fund for Children-ni Rovert D. Stillman Dignity Award 2023-ko on•ahachim.
