Shillong, November 4: Federation Of Khasi Jaintia Garo People(FKJGP) ko abachengdilgipa padot Sounder S Cajee, Mawlai-o FKJGP ni chu·gimik kam ka·chakram nokko November 4 tarik-o oprake onaha. Ia tomanio Cajee, dolni ku·rang on·aniko chone ra·jachina aro maming sinjetaniko dakjachina a·dok sorkarina rakbee ku·rangko on·ataha.
Mawlai Kynton Massar -o FKJGP dolni kam ka·chakramko oprake on·ani somoio, sorkari dolni nangnikaniko ui·chakna nanggen aro chone ra·na nangjawa batesa nanggrimgrikanina golpona okamna nangchongmota ine FKJGP ko abachengdilgipa padot Cajee aganaha.
Adita salrangna skang FKJGP dolni tom·tome re·jomaniko ong·atani somoio, jeon doka satani aro an·chi pari ong·anirang ong·on, chinga indaka an·chi pari nikatgipa kamna darangko didija indiba sorkari iakon gisik ra·na nangchongmotan je dolniba FKJGP ba KSU ba je dolni tom·aniko ba re·jomaniko ong·atengaon sorkarini bobilde ong·ja unigimin sorkari iakoba name nipilaniko dakna nanga ineba Cajee aganaha.
Anga sorkariko jingjengatgipa dolni dilgipa ong·e bang·en rim·a kaako man·aha indiba chingko dontongatna man·jaha. Apsan dake da·alo rim·a kaa man·giparangba watpilahaon dontongna nangjawa indiba nama bewalo chanchie kam ka·skana nanga ineba Cajee aganaha.
Garo Hills-oba FKJGP dolni office-ko apalbatatchina dolni President mol·mole aganaha.
