Shillong, Nov 14: Re•anggipa jao, Federation of Khasi Jaintia & Garo People (FKJGP) dolni re•jomaniko ong•atani somoio, rama gita re•pakangenggipa dos gri manderangko skatang doka satanio jak donggipa sakbonga manderangko da•o dipet police-rang rim•na man•aha ine Superintendent of Police (City) Vivek Syiem aro East Khasi Hills a•jani Superintendent of Police (SP) Sylvester Nongtnger parakataha.
Chadamberangna kam ka•e cha•ani cholrangko on•jaenga ine matnangenba, sorkarini kosako jegale FKJGP dolni re•jomaniko ong•atengmiting somoio, re•jomenggipa manderangoni mitamrang mikkangtangtangko ba•rarangchi katipenba, dosgri manderangko skatang doka sata dakahachim.
Indake ong•engon, ia a•selni bidingo police-rangni sandirokanirangko dakanio FKJGP dolni membor-rangba police-rangna bakrimaniko on•enga aro ia a•selni bidingo police-rang ning•tue sandianirangko dakengkua ine Syiem parakataha.
FKJGP-ni dilgiparangko sing•sandina gita police station-ona okamataha aro FKJGP-ni membor-rang pilakan police station-ona re•baaha ineba ua parakataha.
Indake ong•genchimoba, iani bidingo federation-ni membor-rangko agre sinjete rojachina FKJGP-ni president, a•dok sorkariko didiatskaaha.
