Ampati, Aug 11: Meghalaya a•doko game ge•e cha•enggipa manderangko dakchakna gita a•dok sorkarini a•bachengatgipa Farmers Collectivisation for Upscaling Production & Marketing System (FOCUS) program-ni chu•sokgipa ong•aniko manina gita Bristibar salo dingtangmancha tom•aniko South West Garo Hills a•jani Betasing songo ong•atangaha aro ia tom•bimonganiko ong•atanio Meghalaya a•dokni Chief Minister Conrad K Sangma, mongsonggipa sokgipa ong•e bakko ra•angaha.
Ia tom•bimonganio a•dokni Chief Minister, jinmana aganprakangengon, batanggimin bilsibrini gisepo FOCUS program-ko man•chape, dingtang dingtang scheme-ni ning•o gong kror 1500-na baten tangka paisarangko, a•doko game ge•e cha•enggiparangna suale on•na man•aha ine parakataha.
FOCUS program-ara lak 4.5 game ge•e cha•enggipa manderangni namgnina ra•gatgipa dal•batsranggipa program ong•a ine janapatengon, ia program-ni gamchataniko nike sorkari, FOCUS+ program-chiba a•doko game ge•e cha•enggipa nokdang ge•antinan gong 5000 tangkarangko on•dapna tik ka•aha ine Chief Minister parakataha.
Ia FOCUS program-ni ning•o a•dok gimiko dol 18,000-mangni gita producer group-rangko bikotaha aro iandakgipa dolrangko bikotengkua ineba ua aganaha.
FOCUS+ program-ni ning•o game ge•e cha•enggipa nokdangrangna on•enggipa gong 5000 tangkara sudna on•enggipa tangka paisarang ong•ja indiba ian gama ge•ani kamrangko aro uandake gipin janggi tangani cholrangko a•bachengatna on•enggipa tangka paisarangsa ong•a ineba Chief Minister parakataha.
Shillong-o bilsianti ong•atrongenggipa Northeast Food Show gita dakgipa program-rangko ong•atanichi a•dok sorkari, game ge•e cha•enggipa aro bading chiwale cha•enggipa manderangko tang•doatna man•aha ineba ia tom•anio Chief Minister aganaha.
Ia tom•anio a•dokni Chief Minister, a•dok sorkarini Chief Whip Marcuise Marak, Chief Minister-ni Adviser Thomas A Sangma aro gipin MDC-rang baksa dingtang dingtang producer group-rangna cheque-rangkoba suale on•angjolaha.
