Aizawl, Feb 28: Dingtang dingtang a·barango bang·a gipin a·songrang baksa meli-nangrime mikkangchi bading-chiwalgrikaniko dakna aro bading-chiwalaniko tang·doatna gita salgro-salaramni Mizoram a·doko re·baenggipa March 1 tarikoni 3 tarikona G20’s Business 20 (B20) conference-ko soka-chaknasienga.
Iani bidingo Mongolbar salo, CM conference hall-o kobor ra·timgiparang baksa tom·anio Mizoram-ni skotong minister Pa Zoramthanga-ni aganangani gita, Mizoram a·doko B20-ni tom·bimonganiko ong·atenganichi mongsong nangchongmotgiparangni gimin sokbagnigiparang baksa agan-chanchigrikna namgipa cholko man·gen ine aganatan baksa, Mizoram a·doko daka-rikanirang, manianirang, tourism ba ugitarangni bidingo a·songgipinchini sokbagnigiparangna chingni bil gnanganiko mesokanirangchi mikkangchi bading-chiwalchakna aro tangka-paisarangko botna namgipa biap ong·atna gita a·dokna dakchakaniba ong·gen ine skotong minister parakataha.
Pa Zoramthanga-ni aganani gitade, Argentina, Bangladesh, Bhutan, Canada, Costa Rica, Cote D’lvoire (lvory Coast), China, France, Germany, Ghana, Japan, Nepa, Russia, Sri Lanka, South Africa, United States aro Zimbabwe a·songrangni pal ong·e sokbagnigiparang baksana India a·songoni aro a·joltangoni pilak bading-chiwalgiparang gimikan ia tom·bimonganio bakko ra·toknasienga. Unbaksana, a·songgipinchini sak 48 business delegate-rang aro sak 17 diplomat-rangko man·chape, Bhutan, Bangladesh aro Japan a·songoni Trade and Business delegate-rang aro seoke watatako man·giparangba Mizoram-ni skotong Aizawal-o tom·bimonganiko ong·atnasienggipao bakko ra·epanasienga.
Mizoram a·dokni dingtang dingtang a·barango bil gnanganirangko mesoke bang·a gipin a·songrang baksa bading-chiwalgrikaniko dakna gita pilak tarisamsoanirangko dakani gimin janapatan baksana, a·songgipinoni sokbatoknasienggiparangni re·baenggipa March 3 tariko Assam Rifles Ground-o Mizoram a·dokni mongsonggipa maniani Chapchar Kut-o bakko ra·angjolnasiengani giminba skotong minister u·iangjolaha.
Indake ong·engon, Mizoram a·doko ong·atnasienggipa B20 conference-o, Ma·mong aro a·dokoni adita sak niksenggipa a·gipi sorkari official-rang gimikni dongpaanio, India sorkarini Commerce & Industries-ni minister Pa Som Parkash baksana External Affairs-ni minister Dr RK Ranjan Singh-maangba bakko ra·angtoknasienga.
