Tura, March 3: Dalu oni Baghmara-ona soktinggrike tarianggipa aro ru·uta bilsirangna galchipako man·gipa ramako namdapatna aro taridapna gita a·dokni skotong minister Pa Conrad Sangma baksana MLA, Pa Brening A Sangma-maang Butbar salo pangchakaniko songe on·angaha.
Gimik km 20.853 rangni ramako tariatani kamna, Meghalaya Integrated Transport Project (MITP)ni ning·o tangka gong 43,45,27, 900.00/- (Kror sotbri-gittam lak sotbri-bonga hajal kolgrik-sni Ritcha-sku)ko chamaha aro iako a·bachenge tarichakataoni ja 36-rangon chu·gimik kamko matchotatna somoiko donsoaha. Ia project-ni ning·o ramako namdapata baksana ge 5 RCC dolongko kaatanikoba man·chapa.
Ian ru·utbea bilsirangoni district damgnini manderangni ka·oksie nisengsoenggipa rama ong·achim ine aganengon, ia galchipgimin ramakoba MDA sorkari da·alo chu·sokate on·angtaigen ine pangchakaniko songe on·ao skotong minister Pa Conrad Sangma aganprakaha.
Ia project-ni gamchataniko aganengon, “Dalu oni Baghmara sima-ariona nangtinggrike tarigipa ramako ru·uta bilsirangna kingkingan galchipe donaha, indiba da·alo iako tariatanichi Dalu-Baghmara sima-ari jolrango donggipa manderangna pattiani ong·chongmotgen. Bading-chiwalani aro game-ge·e man·gimin bosturangko pala-sim·anirango ia ramaan ua jolni manderangna namen gamchatgipa ong·a,” ine skotong minister agandapaha.
Iana tangka chamani bidingo aganengon, “A·dok gimikna Meghalaya Integrated Transport Project-ni gita dingtang dingtang project-rangna World Bank-ni on·atgipa chu·gimik tangkara gong kor 1100 mangni gita ong·a jeoniko ia project-na kror 43 tangka-paisarangko chamaha, iana work order-ko on·manaha aro kamrangkoba a·bachengengaha, ine Pa Sangma talataha.
Ia project-chi songsalo janggi tanganiko tang·doataniko agananio, “a·song gipin baksa bading-chiwalgrikanio aro man·gipa bosturangko pala-sim·anirango ia rama namen nangchongmotgipa ong·a aro ia ramaan damgni district-rang — West Garo Hills aro South Garo Hills-ko nangdimatgipaba ong·a. Gama-ge·anio aro bolam-biterango pangchake janggi tangenggipa a·jani manderangna ian namen dakchakbeani ong·gen. Ia project-chi a·jani chasong damberangko gama-ge·ani aro bite nanggiparangko ge·anio gisiko nangate bading-chiwalanichi janggi tangani cholko dake ra·na gitaba didiani ong·angjolgen ine chinga ka·dongsoenga,” ineba Pa Sangma parakataha.
“MDA sorkari pangchakani ro·ongrangko songe mangmangsan on·e uko chu·sokate on·anirangde dongja ine manderangna gisepo matnange agangipa kattarangna aganchakengon, MDA sorkari aro NPP sorkari maming dakeba Dalu aro Baghmara-ni manderangko cha·bokna ong·ja ine anga na·simangna pil·satai ka·dongataniko on·na nangnika aro chinga jekon manderangna ku·rachaka uko chu·sokate on·nasa dangdike on·enga,” ine ua parakatkuaha.
A·chik a·songko namdapatna gita sorkarini niksamsoe kamko ka·engani gimin agan-janapengon, “A·jao ge·samangmang dongpagipa Baljek airport-ko chalaina gita sorkari miksongenga ba re·baenggipa 2022 bilsio Meghalaya a·dokko man·ani bilsi 50 gapaniko manina nichaksoanio una skang Tura oni Shillong-ona sildoreng wataniko mangmangde a·bachengate on·na gita miksongani gnang. Re·baenggipa bilsi-gnionaba a·dokko aro Garo Hills-ko namroro-silroroatani kamrangko ka·angna gita mangsonganirang gnang ine skotong minister agandapaha.
Janapjolna gita Dalu Chaipani-ni NH 217-oni a·bachenge Barengapara division-ni ning·ogipa (Sibbari-ona kingking) chu·gimik km 31 mang bakrogipa ramara Baghmara-o bon·egipa ong·a. Ia ramaan a·songgipin Bangladesh sima-ari chapchapgipa jolrangko man·chape tarianggipa ong·an baksana mongsongbatgipa songrang jekai West Garo Hills-ni Chaipani aro Baburambil aro South Garo Hills-ni Jatrakona, Sempara, Lower Gauapara, Angratuli, Khondok, Fakirkona, Dumnikura, Ramchenga, Kapasipara, Dipliparara aro Sibbari ia songrang gimikko nangtinggrikatgipaba ong·a. Indo-Bangla sima-arirangko nitimna gita BSF dolrangba ia ramakon jakkala aro koelarangko Bangladesh-china watatnaba Gasuapara Land Custom Station gita iakon jakkalenga.
