Shillong, Sep 30: Gambegre constituency-ni NCP MLA aro Board of Directors of Meghalaya Tourism Development Corporation (MTDC) Ltd-ni chairman Pa Saleng Sangma, mija Butbar waljatchio MTC bus garini a·sel ong·anina an·tangni suk ong·gijaniko parakataha.
An·tangni suk ong·chakgijaniko Hub News-na agangananio, a·selrang ong·gnioni beben darangba gelna man·ja indiba champengsoaniko dakani ba mitam daitorangko sorkarian jako ra·ani gimino ia ong·a obostana sorkarian daitoko ra·na nanga ine aganenba, ia apsandakgipa obosta ia ramaon ong·aha, uni gimin mikkangchi iandakgipa a·selrangko champengna man·na gita airport-o pilot-rangko dakata gita apsan, mande jinma songregipa bus garirangko chalaigiparangni chu ringa ba ringgijaniko raken sandianiko dakatna nanga ine Pa Sangma agandapataha.
“Ian sorkarini chu·gimik gualani ong·a, maina iandakgipa kamrangko sorkari jako ra·e nirokatgenchimode ia a·selrang ong·jawachim ine duk ong·bee aganenba, iani bidingo ua sorkarina chittiko sedoatgen ineba Pa Sangma aganangkuaha.
A·sel ong·gipa bus gario songregipa gimik sak 21-oni bang·batan bilsi damberangsa ong·tokachim jemangon mikkangchina nikjumangani, miksonganirang gnang aro uamangan mikkangchi dilgnigiparang ong·achim indiba an·chingni sorkarini a·sel da·alo uamang ia obostako chagrongna nangaha ine aganatan baksa, a·selo sianggipa manderangni nokdangrangna Pa Sangma an·tangni kalimpaanikoba on·atjolaha.
Unbaksana, adita salna skang bolsa boulder trak garini saljetako man·e Garo Hills-oni me·a bi·sa saksani siangani giminba NCP MLA, iano dingtangmancha badingchiwalgiparang aro politician-rangko jaksi otenba uamangni tangkana mikbokrakani a·sel dos gri manderangsa pilak obostako chagrongenga ine matnangataha.
Chu ringe gari chalaigiparangna raka sastiko on·na nanga, uamangko ra·galna nanga aro licence-rangkoba sekna nanga aro uandakgipa driver-rangkode janggi tangakrip gari chalainaba on·srangna nangja ine Pa Sangma agandapataha.
