Delhi, Jan 24: India a·songo game ge·e cha·giparang, hajira kam ka·e cha·giparang aro ba·ra doke cha·giparangan a·songni bil ong·a aro ia dolrangko sorkari mangrakbatatgenchimode a·songni simarango chel·chakgipa sipai dolrang, China a·songko warachakna nangjawachim ine Robibar salo Congress dolni dilgipa Rahul Gandhi aganaha.
A·songo hajira ka·e cha·giparangko aro ba·ra doke cha·giparangko dakchakani pal BJP dolchi dilenggipa ma·mong sorkari, dal·dalgipa bading chiwalgiparangkosa mikpakma niskaenga ineba ua matnangataha.
“India a·songo hajira ka·giparang, game ge·e cha·giparang aro ba·ra dokgiparang bilakgenchimode, chel·chakanirangko man·genchimode aro cholrangko on·genchimode, China a·song India-ona napbana ka·dongjawachim,” ine Gandhi, Tamil Nadu a·dokni Erode songjinmao aganaha.
Tamil Nadu a·dokoba re·baenggipa April-May jani gisepo election-ko ong·atna siengani gimin Congress dolni dilgipa, salgittamna Tamil Nadu a·dokona re·angahachim.
“Anga na·simangna dakchakna gitasa ianona re·baaha. Angni nokdang maikai ia a·dok baksa nangrimani gnang na·simang pilakan ma·sia. Indira Gandhi, angni pagipa gimikan ia a·dokni ka·saaniko man·giparang ong·a aro ia ka·saanirangna anga na·simangna gro nanggipa ong·skaenga,” ine Tamil Nadu a·doko election-na campaign-ko ka·ani somoio Rahul Gandhi aganaha.
A·songni Prime Minister Narendra Modi, Tamil Nadu a·dokni manderangna, jatni daka rikanina aro ku·agananirangna mande ra·ani dongja ineba Gandhi matnangataha.
