New Delhi, Jan 2: Ma•mong sorkarini ra•gatgipa Farm Laws-ni niam minggittamko ra•galpilchina a•songo game ge•e cha•enggiparangni dabianiko sorkari knachakjagenchimode, re•baenggipa January-ni 26 tariko a•songni Republic Day-ko maniani salo ‘Tractor Parade’-ko dake sorkarini kosako jegalanggen ine Sonibar salo, dingtang dingtang game ge•e cha•gipa dolrangni nangrime bikotskagipa Samyukt Kisan Morcha parakataha.
Iani bidingo New Delhi-o press conference-ko ong•ate kobor ra•timgiparangna parakatengon, game ge•e cha•enggipa manderangni dabianiko ma•mong sorkari knachakna gisiko nangjaengani gimin uamang, re•baenggipa January 6 tarikoni sal 15-na dingtang dingtang dake sorkarini kosako jingjengatna manchimanaha ine Samyukt Kisan Morcha-ni dilgiparang parakataha.
Samyukt Kisan Morcha-ni parakatani gitade, game ge•e cha•enggiparangni dabianiko knachakjaengani gimin uamang, re•baenggipa January 6 tarikoni a•bachenge Raj Bhavan-o kam ka•anirangko champengatanggen, Delhi songjinmani rikamrango jinma re•jomanirangko dakgen aro January-ni 26 tariko dingtangmancha ‘Tractor parade’-ko dake sorkarini kosako jegalanggen.
Re•baenggipa January-ni 4 tariko game ge•e cha•giparang, sorkari baksa agangriktaina siengani gimin uamang agangrikanio sorkari maiko aganchaka uko nichenggen aro January-ni 5 tariko Supreme Court-ni hearing dakanio rai on•anikoba uamang nichenggen ineba Samyukt Kisan Morcha-ni dilgiparang parakataha.
“Uni gimin chingni dabianirangko Republic Day-ni gisepo chu•sokatjagenchimode chinga jinma tractor-rangko sale Delhi songjinmao napna a•bachenggnok. Chingni dabianirangoni 50 percent-kode chu•sokataha ine sorkari aganenga indiba chingni dal•batsranggipa dabianirangkon sorkari chu•sokatna gisiko nangjaenga,” ine Samyukt Kisan Morcha-ni dilgipa Yogendra Yadav parakataha.
Re•anggipa bilsini September jao Parliament-o ra•chakmangipa niam minggittamko ra•galpilchina dabie a•songni dingtang dingtang biaprango game ge•e cha•enggiparang, sorkarini kosako jingjengatanirangko dakengachim ine nikna man•a.
Ia niamrangara, ‘The Farmers’ Produce Trade and Commerce (Promotion and Facilitation) Act, 2020’, ‘The Farmers (Empowerment and Protection) Agreement on Price Assurance and Farm Services Act, 2020’ aro ‘The Essential Commodities (Amendment) Act 2020’ ong•engachim ineba nikna man•a.
