Shillong, Jan 10: Meghalaya a•doko game ge•e cha•enggipa manderangko dakchakna gita Sukrobar salo, East Khasi Hills a•jani Sohra-o Cabinet tom•aniko ong•atanio, ‘CM ASSURE’ scheme-ko ra•chakangaha.
Ia scheme-ni bidingo talataniko on•angengon, ia scheme-ara dingtang dingtang a•selrangchi gama ge•anio neng•nikanirangko chagrongna nangenggipa manderangna dakchakaniko on•gen aro sal•wa, gue ba uandakgipa bosturangko sorkari breskaenba, marketing board gita palskagen ine a•dokni Chief Minister Conrad K Sangma parakataha. Ia program-chi, bazar antirango neng•nikanirangko man•enggipa game ge•e cha•giparangna chu•gimik dakchakanirangko on•anggen ineba Chief Minister aganaha.
Indake ong•engon, 2007 bilsina skang adhoc basis-o kamo rakkia man•gipa sak 850 kam ka•giparangko regularize ka•na gita ia tom•anio Cabinet ra•chakangaha. Chief Minister-ni u•iatani gitade, ia sak 850 manderang, 2022 bilsio sak 3000 kam ka•giparangko regularize ka•na segatanio watchanggalako man•ahani gimin Cabinet, ia sak 850 manderangkoba kamo regularize ka•na ra•chakangaha.
Una agreba, Meghalaya Factories Rules 1980-ni Rule 98-o Rules 98A-ko on•dape, ia niamko Cabinet taridapaha ine Chief Minister parakataha. Karkanarango kam ka•anirangko altubatatna aro karkanarango kam ka•enggiparangna naljokaniko on•na gita ia niamko taridapaha.
Cabinet tom•anio, hajira kam ka•enggiparangni man•gnirangkoba bariatna tik ka•angaha aro uandaken da•o Unskilled labour-rang salprako gong 525, semi-skilled labour-rang gong 565-ko, skilled labour-rang salo gong 605-ko aro highly skilled labour-rang salo gong 654 ka•e hajirako man•gnok.
Ia Cabinet tom•anio sorkari, Assured Career Progression Scheme (ACPS)-ni niamrangko nom•batatan baksana Meghalaya Ceiling on Government Guarantees Bills 2025-koba ra•chakangaha.
Unbaksana ia tom•anio, Fisheries department aro uandakgipa department-ni Executive Engineer-rangna financial power-rangko on•na tik ka•anikoba Cabinet ra•chakangaha.
Indake ong•engon, Meghalaya Building & Other Construction Worker’s (Regulation of Employment & Condition of Service) Rules 2008 Amendment aro Meghalaya Fiscal Responsibility and Budget Management Act, 2006 Amendment-koba ia tom•anio Cabinet ra•chakangaha.
Ia tom•anio, re•baenggipa January-ni 26 tariko a•songni Republic Day-ko a•dokni dingtang dingtang biaprango manidilna gita VIP-rangkoba Cabinet ra•chakangjolaha.
Na·simang ia video-koba nina man·gen:
Na·simang iakoba poraina man·gen: KHADC aro JHADC-ni election-o susagni candidate-rangni gnigipa list-ko Congress dol parakata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
