Shillong, Sept 16: Batanggimin bilsisani gisepo Meghalaya a•doko game ge•e cha•giparang bang•en noksan ong•ataniko man•e neng•nikanirangko chagrongna nangtokengoba maming dakchakanirangko man•jaenga ine Bristibar salo, Opposition MLA-rang parakatenba, game ge•e cha•giparangni neng•nikanirangko niatchina gita a•dok sorkariko didiangaha.
Assembly-ni Autumn Session-o Mawsynram-ni Congress MLA HM Shangpliang, a•doko game ge•e cha•giparangni gimin chanchirimaniko dakdilangengon, game ge•e cha•giparangna sorkari, badingchakani biaprangko kulie on•na ku•rachakahachim indiba da•alonan iandakgipa bading chiwalram biaprangko kulie on•na dongkujaenga ine an•tangni suk ong•gijaniko parakangaha.
COVID sajinmani a•selan game ge•e cha•enggiparangni janggi tanganio neng•nikanirangko chagrongna nangtokengaha ine janapatengon, badiaba somoirangode game ge•e cha•enggiparangko police-rangba pass gri me•su samjakrangko palna sim•na ra•baako sinjete roaha ine Shangpliang parakataha.
Game ge•e cha•enggiparangna dingtangmancha tangka paisarangko chamchina gitaba ua sorkariko didiangaha.
Apsan daken gipin MLA-rangba, a•doko game ge•e cha•giparangna dakchakanirangko on•china gita sorkariko didiangtokaha.
MLA-rangni sing•anirangna aro matnanganirangna a•dokni Chief Minister Conrad K Sangma, aganchakaniko on•angskaengon, batanggimin bilsisa atani gisepo COVID sajinmani a•sel pilakan neng•nikanirangko chagrongna nangtokaha aro a•doko manderangni janggi tanganiko ra•dopiltaina gita sorkari, economic task force-ko songe, dingtangmancha Mission-koba a•bachengattaiaha ine parakataha.
Game ge•e cha•enggiparangni namgnina Agriculture department, bading chiwalani gipin cholrangko a•bachengatskaaha ine janapatengon, game ge•e cha•enggiparangni bosturangko salna gita sorkari, 1917 dolko nambee jakkalna man•aha aro ia dol, game ge•e cha•giparangoniko metric ton 750 bosturangko chang 700 trip-rangchi salaha ine Chief Minister parakataha.
Da•o dipet ia 1917 dolo bol 20-oni bol 30-mangni gita pick up garirang donga aro ia garirangko sorkari, bol 250-oni bol 300-mangona bariatna miksongenga ineba Sangma aganaha.
May jao metric ton 2184 me•surangko Meghalaya aro Assam a•dokni samba jolo donggipa a•dokrangona watataha aro June jaoba MT 2234 me•su baksana MT 67 biterangko gipin a•dokrangona watatna man•aha ineba Chief Minister parakataha.
