Shillong, Feb 1: Mongolbar salo, Meghalaya a•dokni Health Minister James PK Sangma, Shillong songjinmani Ganesh Das Government MCH Hospital-o Paediatric Intensive Care Unit (PICU)-ko kulie on•angaha.
PICU-ko kulie on•angani ja•man, a•dokni Health Minister, jinmana aganprakangengon, ia hospital-o sannako man•enggiparangoni sak 30-na baten bi•sarango nangchakegiparangsa ong•a ine parakangaha.
Bilonge sagipa bi•sarangko sanna gita ia hospital-o PICU-ko nangchongmotengachim ine janapangengon, Meghalaya a•dokni bilsi 50 gapaniko maniani bak gita ia project-ko a•dokni manderangna on•kangangna gita ua namen kusi ong•a ine Sangma parakataha.
Ia PICU-ko kulie on•anganio Health Services (MI)-ni Director Dr Aman Warr-ba dongpae jinmana aganprakengon, ia hospital-o PICU dongkujani gimin ia unit-ko kulianiara ia hospital-na namen gisik ra•ani sal ong•aha ine parakangaha.
Ia hospital-o PICU-ko kulianichi bi•sarangni saanirangko aro bi•sarangko sannanio bang•a namgni ong•gnok ineba Dr Warr aganaha.
Iana skang, Ganesh Das Hospital-ni Senior Paediatric Specialist, Dr T Pde-ba jinmana aganprakangengon, ia hospital-o PICU-ko 2021 bilsini June jao rikna a•bachengahachim ine parakangaha.
Ia tom•anio Health department-ni Principal Secretary Sampath Kumar-ba jinmana aganprakangengon, sorkarichi chalaienggipa hospital-rango ian skanggipa PICU ong•aha aro a•dokni gipin biaprango donggipa sorkari health centre-rangoba ia apsan dakgipa unit-rangko kulina siengaha ine parakangaha.
