Gangtok, Dec 12: Mongolbar salo, Sikkim a•dokni Gangtok songjinmao donggipa Paljor Stadium-o Dalai Lama-ni skiprakaniko knatimna gita sak 30,000-mangni gita manderang tom•chimongtokaha aro ia manderangna ua Gyalsey Thokme Sangpo-ni skianirangko agan-talate on•angaha.

Gyalsey Thokme Sangpo-ni Bodhisattvas-ni bidingo skianirangko agan-talate on•angengon, gisiko nange aro mikrakbee sakgipinni chanchianirangko nie ra•genchimode sakgipinrangni namanikoba manderang skie ra•skana man•a aro iako salrikkit dakanichi namgnirangkoba bang•bate man•gen ine Dalai Lama aganaha.

Adita salrangna skang Sikkim a•doko chi bananichi sianggipa manderangna aro Sikkim a•doko songdongenggipa manderangni janggi tanganio tom•tomani aro kusininaba ia tom•ani Lama, dingtangmancha bi•chakangaha.

Ia tom•bimonganio Sikkim a•dokni Chief Minister Prem Singh Golay-ba jinmana aganprakangengon, Dalai Lama-ni namgipa kattarangna aro pattianirangna mittelpilangenba, uan Sikkim a•dokna dilenggipa teng•ani gita ong•a ine parakataha.

Sikkim a•dokona re•baanio Dalai Lama, Sikkim sorkarini minggni project-rangna, chong•motan Rumtek-Martam constituency-ni Karmapa Park project aro Simik-Singtam Khamdong constituency-ni Gyalwa Lhatsun Chenpo Statue project-na pangchakanirangkoba songe on•angjolaha.

Iakoba poraie nina man·gen: Salgro-salaram a·dokrang kal·susaanio Indiani ripok do·katchi gita ong·a : Sourav Ganguly