Tura, Feb 13: Sonibar salo, Meghalaya a·dokni Chief Minister Conrad K Sangma, West Garo Hills a·jani Ganol songo gital Dairy Complex-ko rikna gita pangchakaniko songe on·angaha aro iana pangchakaniko songe on·angani somoio ua jinmana aganprakangengon, a·doko dudni kamrangko tang·doatna sorkari, nanga gita tangka paisarangko chamenga ine parakangaha.
Chief Minister-ni aganani gitade, a·doko ra·gate on·gipa ‘Dairy Mission’ program-chi dudni kamrangko tang·doatna gita sorkari dingtang dingtang Dairy Cooperative Society-rang baksa nangrime kamrangko ka·enga.
Ganol-o ia gong kror 10.52 ong·gipa Dairy Complex-ko rikna gita India sorkarini National Programme for Dairy Development (NPDD) gong kror 9.15-ko aro West Garo Hills a·jani Milk Producers Union, gong lak 86.27 tangkarangko on·gilskaaha aro ia gital Dairy Complex-o salprakon litre 10,000-ko dudko man·gen.
Meghalaya a·doko, wak, matchu, do·bok, do·o, na·tok aro dudni bosturangko komie man·ani gimin a·songni gipin bakrangonikosa ra·baskana nangenga ine talataniko on·angengon, jilla kaanirangko bading chiwalanichi a·doko man·aniara gong kror 4500 gapgenchimoba gong kror 2250-mangni gitade gipin biaprangonasa re·angskaenga ine Chief Minister parakatenba, jilla kaanirangko bading chiwale cha·china gita jolo bading chiwalenggipa manderangko didiangaha.
Gong kror 215 ong·gipa Dairy Mission-ara cooperative society-rang gita game ge·e aro bading chiwale cha·enggiparangna cholrangko on·na miksonge ra·gatgipa program ong·a ineba ia tom·anio Chief Minister parakangaha.
A·doko a·bachengatenggipa Piggery Mission-ni bidingo talataniko on·angskaengon, ia mission-ara gong kror 209-mangni program ong·e a·songo dal·batsranggipa piggery project-rangoni mingsa ong·enga ine Chief Minister parakataha.
Poultry Mission-koba a·bachengatna gita sorkari gong kror 120-ko chame donaha ine janapatskaengon, a·doko Goatry Mission-naba sorkari ia bilsini gisepon gong kror 75-ko chame donmanaha ine Sangma parakataha.
