Tura, Nov 5: 1973 bilsio kulichenggipa Tura Diocese-ni bilsi 50 gapaniko November-ni 4 aro 5 tarikrango, Tura-ni Sacred Heart gilja nok aro Don Bosco Stadium-o maniangaha aro ia manianio Garo Hills-ni ki·tikbrionin Catholic bebera·gipa tom·chimongbae bak ra·angtokaha.
Robibar pringni olakkianio, Guwahati-ni Archbishop John Moolachira, jinma tom·bimonganiko dilangaha aro Tura Diocese-ni bilsi 50 gapaniko manianina dingtangmancha pattianikoba on·angaha.
Ia tom·aniona, Meghalaya a·dokni Chief Minister Conrad K Sangma-ba Shillong-oni dingtangmancha helicopter-o bilbae bakko ra·angaha aro cultural program-ko ong·atanio jinmana aganprakangaha.
Ia tom·anio a·dokni Chief Minister baksana Tura-ni MP Agatha K Sangma, Meghalaya Assembly-ni Speaker Thomas A Sangma, GHADC-ni CEM Albinush Marak, gipin MLA-rang aro MDC-rangba dongpae bak ra·angtokaha.
Ia tom·anio a·dokni Chief Minister, hajal kotok Catholic bebera·giparangna aganprakangengon, ia salara dingtangmancha Tura Diocese-ni bilsi 50 gapaniko nikna man·ahani gimin Nokgipa Isolko mittelpilani sal ong·enga ine aganangaha.
Garo Hills-o bida budi aro an·seng baljokani kamrangko nambatatna gita bang·en on·gilahani gimin Catholic Mondoliko mittelpilangengon, bang·bea pamongrang, missionary-rang aro bebera·giparangoniba A·chik a·songni namgnina an·tangtangko on·kange kam ka·aha ine Chief Minister aganaha.
Garo Hills-ni dingtang dingtang biaprango chansokpilgijagipa skulrangko aro dispensary-rangko kulina gita kamko ka·dilgipa Bishop Emeritus George Mamalassery-koba ia tom·anio Chief Minister dingtangmancha mittelpilangaha.
Covid sajinmani somoio sabisi man·gipa manderangko sanchakna gita Tura-ni Pastoral Centre-ko on·ahani gimin aro lockdown-ni somoirango cholgri manderangna cha·anirangko aro ma·manti bosturangko dakchake on·ahani giminba ua Tura Diocese-ko mittelpilangaha.
Iana skang, Tura-ni Bishop Rev Andrew R Marak-ba jinmana aganprakangengon, Garo Hills-o kulichenggipa Catholic Parish-rangara, da·o Assam a·dok ning·o ong·gipa Damra, Dalu, Baghmara, Tura, Rongjeng aro Resubelpara ong·achim aro da·o Garo Hills-o gimik dam 47 parish-rang dongaha ine jinmana parakataha.
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
