Shillong, May 28: Garo Hills-o COVID-19-ko warachakanio kamrangko nirok ka·dilna gita Meghalaya sorkari, sak bonga membor donggipa Special Committee for COVID Management-ko songe on·angaha aro ia committee-ko Garo Hills Region-ni Commissioner of Divisions Dr D Vijay Kumar, chairperson ong·e dilanggen.

Health & Family Welfare department-oni u·iatani gitade, Garo Hills-ni dingtang dingtang hospital-rango aro PHC/CHC-rango kam ka·giparang chu·ongjaengani a·sel COVID-ko warachakanio dingtang dingtang neng·nikanirangko chagrongna nangengani gimin Garo Hills-ni dambonga a·jarango nanganirangko niroke kamko ka·na gita ia committee-ko songe donangaha.

Health Services (MCH&FW)-ni Joint Director Dr S Nongbri-ko ia special committee-ni Senior Official, Directorate of Health Services (DHS)-na songaha aro ia committee-ni gipin sakgittam membor-rangara, Health Services (GH Unit)-ni Joint Director aro Tura Civil Hospital-ni Medical Superintendent Dr Minakshi Sangma, Social Welfare department-ni Director DD Shira aro H&FW Department-ni Joint Secretary DD Sangma ong·a.