Tura, Dec 18: Da·ororo Assam a·dok aro Bangladesh a·songoni ‘drugs’ ba pekatgipa samrangko badingenggipa manderang, Garo Hills-ona ra·bae palbadingna jotton ka·engon, Bristibar salo Meghalaya Police aro BSF dolni sipairang, Assam a·doko donggipa Mankachar-oni sam badinggipa mande saksako South West Garo Hills a·jaona dakbagipa ramaoniko rim·sona gita man·aha.

South West Garo Hills a·jani Superintendent of Police (SP) Rituraj Ravi-ni u·iatani gitade, ia mande rong 3499 Yaba tablet-rangko ra·e Garo Hills-ona re·baengachim aro uko police-rang, Monabari check point-o rim·sona man·aha.

“Deputy SP-ni dilanichi Police aro BSF dolni sipairang, ia mandeko aro uni ra·baenggipa Yaba tablet-rangko Monabari police check point-o rim·soaha,” ine South West Garo Hills a·jani SP parakataha.

Ia mandeko rim·ani ja·mani police-rang sing·sandion, ua ia Yaba tablet-rangko sakgipin mandeona ra·baengachim ine ia mande police-rangna ku·rachakaha.

Ia mandeoniko sawa ia pekatgipa samrangko ra·sona sengsoengachim, ukoba rim·na gita police-rang sandiengaha ine SP u·iataha.