Tura, Apr 2: Jisu Kristoni Jerusalem songjinmao rasong chabee napaniko gisik ra·na gita bilsianti manirongenggipa Palm Sunday-ko Robibar salo, Garo Hills-ni dingtang dingtang biaprangoba Kristian bebera·giparang gisiko nangbee maniangtokaha.

Jisu Kristoni Jerusalem songjinmao rasong chabee napaniko gisik ra·na gita bilsiantian Kristianrang, Palm Sunday-ni salo, kejur aro ma·manti bibalrangko ra·e Nokgipa Isolna aro Jisu Kristona ring·mittelanirangchi rasongko on·ronga aro uandaken ia saloba dingtang dingtang gilja nokrango, Kristian bebera·giparangni jinma kusi ong·e olakkianirangko nikangna gita man·taiaha.

New Tura-ni Rosary Church-o St Mary’s School-ni Principal Father Thomas John, olakkianiko dilangengon, Jisu Kristoni Jerusalem songjinmao rasong chae napaniko jinmana agan-talate on·angenba, mande janggi tangchina aro saksa sakgipinna ka·sagrikchina gitasa an·tangni janggiko chisolo on·kangaha ine parakangaha.