28.8 C
Tura
spot_img

Garo Hills-o skanggipa Sanitary Pad tariani kolko oprake on·a

Must read

Tura,Dec 16: Rongram Block-ni ning·o donggipa Te·bronggre songo skanggipa Sanitary Pad tariani kol ba machine-ko Budbar salo West Garo Hills-ni Deputy Commissioner (DC) oprake on·angaha.

Garo Hills-o ia Sanitary Pad tarini kolko ra·baani skanggipa ong·enga.Ia kol ba machine-ko ra·bana gita Te·bronggre songni wilwilao dongenggipa ma·gipa dol Self Help Group (SHG)-rang gisiko nangbee kam ka·an baksa National Rural Livelihood Mission (NRLM)-ni Co-ordinator aro gipin officer-rangni tangka paisa on·ne dakchakachi rasong gnangbee ia Sanitary Pad tariani kolko ra·bana gita man·ahachim.

Te·bronggre songo SHG-rangko 2016 bilsio a·bachengataha, maina ma·giparang songo noko indin kam gri dongengani gimin tangka paisa man·ani maming chol dongjachim, indiba jensalo SHG-rangko bikote kamrangko a·bachengataha ma·gipa dolrang ka·sin ka·sin SHG-rangko bilakatna man·aha aro an·tangtangna janggi tangani cholkoba man·aha ine ma·giparangoni saksa aganaha.

Ia Sanitary Pad tariani kolko oprake on·ani salo mongsonggipa ong·e sokbana gita Tura-ni MP, Agatha Sangma-ko donsoahachim, indiba gelna man·telgijagipa a·selchi ua sokbana man·jaha, indake uni palo West Garo Hills-ni DC, Pa Ram Singh mongsonggipa sokgipa ong·e bakko ra·angskaha. Ua mongsonggipa sokgipa ong·e jinmana aganengon, anga da·alo skanggipa Te·bronggre songo Sanitary Pad-ko tarina machine-ko man·ahani gimin namen kusi ong·a aro ia machine-ko man·bana gita rake kam ka·gipa ma·giparangni SHG dolrangko namen mitela ine ua aganaha. Da·alo na·simang songtangon Sanitary Pad-ko jaktangchi tarie jakkalna man·gnok, ian dal·drobaenggipa me·chik chadamberangna namen dakchakbeani ong·gnok, maina ia Sanitary Pad-ara dal·drobaenggipa me·chik chadamberangni jakkalna nangchongmotgipa bostu mingsa ong·a ineba ua aganangaha.

Uni gimin mikkangchi ma·gipa dolrang rakbate aro chu·soke kamrangko ka·angna nanga aro na·simangni man·bagipa kol ba machine-ko galchipgija pangnan kamna jakkalna nanga ineba ua ma·gipa dolrangko aro songni manderangko didiangaha.

Unbaksana ia Te·bronggre songosan ong·aigija ia kolko Garo Hills-ni dingtangdingtang songrangona ra·bae Sanitary Pad-ko tarina man·genchimode nambatgipa ong·genchim aro block level-ni gitaba maiba scheme-rangko on·ne dakchakna gita man·genchim, uni gimin je kamko ka·engon gisiko nange aro bimchipe ka·na nanga, unosa chu·sokaniko man·a ine DC agandapangaha.

spot_img

More articles

spot_img
-->

Latest article