Tura, June 7: Garo Hills-o manderangni rotogipa aro nina nitobegipa biaprang bang•en donggenchimoba, gipin biaprangoni re•bagipa tourist-rang komiengani a•sel tourism-ni kamrang tang•dona gita man•jaengani gimin, Budbar salo West Garo Hills a•jani Additional Deputy Commissioner (ADC) AVD Shira aro Tourism Ministry North East-ni Regional Director Anil Oraw-ni dilanichi, kamrangko nipiltaina gita Tourist officer-rang aro tourism-ni kamo bak ong•enggipa dingtang dingtang dolrang baksa Tura-ni Circuit House-o tom•aniko ong•atangaha.

Ia tom•anio Tourism Ministry North East-ni Regional Director Anil Oraw, tom•anio bak ra•gipa officer-rangna aro dingtang dingtang dolrangna aganprakengon, Garo Hills-ni mingsing minggamgipa biaprang aro rona rotogipa biaprangni bidingo gipin biaprangoni manderang knatokkujaengani a•selsa Garo Hills-ona tourist-rangni re•baani namen komienga ine tourist-rangko salbana gita ia biaprangni bidingo bang•en advertisement-rangko on•china ku•pattiangaha.

Garo Hills-o tourism-ko tang•doatanio ua pilak nanga dakchakanirangko on•na gitaba ku•rachakaniko on•angaha.

Iana skang, West Garo Hills a•jani ADC AVD Shira-ba, tom•anio bak ra•enggiparangna aganprakengon, Tourism Ministry North East-ni Regional Director-ba dongani gimin mikkangchide Garo Hills-oba tourism-ni kamrangko tang•doatna man•gnok aro bang•a tourist-rangan Garo Hills-ona re•batokgnok ine an•tangni ka•dongchakenganiko parakataha.